Ռուպերթ Մերդոքի News Corp. կորպորացիան վաճառել է երբեմնի ամենահայտնի սոցիալական ցանցերից մեկը՝ MySpace-ը, 35 միլիոն դոլարով: Գնորդը Specific Media ընկերությունն է: Այս մասին հաղորդում է The Wall Street Journal-ը:
Աղբյուրների տվյալներով՝ Մերդոքն իրեն է պահելու սոցցանցի 5%-ը: Նախատեսվում է, որ կկրճատվի սոցցանցի աշխատակիցների կեսը, ինչը համարվում էր վաճառքի պայմանագրի կարևոր կետերից մեկը: Իր հրաժարականի մասին է հայտարարել MySpace-ի գլխավոր տնօրեն Մայք Ջոնսը:
Հիշեցնենք, որ Մերդոքը MySpace սոցցանցը գնել էր 2005 թ. 580 մլն դոլարով: Alexa.com կայքի տվյալներով՝ այս տարվա փետրվարին MySpace-ն աշխարհի 56-րդ ամենաայցելվող կայքն էր: 2007 թ. սոցցանցը գնահատվեց 5 մլրդ դոլար, սակայն արդեն 2010-ին, երբ սոցցանցի այցելուների թիվը կտրուկ կրճատվում էր, այն արդեն գնահատվում էր 1 մլրդ դոլար: Փաստորեն, MySpace-ը չկարողացավ մրցակցել Ցուկերբերգի Facebook-ի հետ, ինչպես և նախկինում կանխատեսվում էր:
