Երեկ Նյու Յորքի Քենեդու անվան օդանավակայանը կաթվածահար է եղել այն բանից հետո, երբ վազքուղի է դուրս եկել մոտ 150 կրիա, որոնք ամեն տարի այս օրերին տեղ են փնտրում ձվադրության համար: Նյու Յորքի օդանավակայանի ներկայացուցիչներն ասել են, որ չվերթները հետաձգվել են մոտ կես ժամով:
Ինչպես հաղորդում են ամերիկյան լրատվամիջոցները, այդ ընթացքում օդանավակայանի աշխատակիցները որսացել են կրիաներին և տեղափոխել նրանց ապահով վայր:
Նշվում է, որ սա առաջին դեպքը չէ, երբ կրիաները խանգարում են այս օդանավակայանի բնականոն աշխատանքը: Օդանավակայանը գտնվում է Ջամայկա ծոցի ափին, որտեղից էլ կրիաները ներխուժում են վազքուղի: Այսպիսի դեպք եղել էր նաև 2009 թ., երբ մոտ 80 կրիա դարձյալ արգելափակել էր վազքուղին: