Այս տարի լրանում է «Իրան և Կովկաս» հայաստանյան միակ միջազգային գրախոսվող, ազդեցության գործակից ունեցող արևմտյան լեզուներով (անգլերեն, ֆրանսերեն, գերմաներեն) տպագրվող արևելագիտական/հասարակագիտական պարբերականի 15-ամյակը (Iran and the Caucasus, ed. by Garnik S. Asatrian, Brill Academic Publishers, Leiden-Boston)։
2011թ. հուլիսի 1-2-ին Երևանում տասնչորս երկրներից ժամանած ավելի քան հիսուն և քսան տեղացի գիտնականների մասնակցությամբ տեղի կունենա «Իրան և Կովկաս» միջազգային պարբերականի 15-ամյակին նվիրված գիտաժողով։
Գիտաժողովի հանդիսավոր բացումը տեղի կունենա հուլիսի 1-ին (ուրբաթ), ժամը 10.00-ին, Երևան, Աբովյան 50/5 հասցեում գտնվող «Հայաստանի երիտասարդական հիմնադրամի» մեծ դահլիճում։
Բացմանը ելույթ կունենա ՀՀ Գիտության պետական կոմիտեի նախագահը Սամվել Հարությունյանը, «Իրան և կովկաս» միջազգային պարբերականի խմբագիր Գառնիկ Ասատրյանը, անվանի գիտնականներ ու հետազոտողներ:
Գիտաժողովի ծրագրին կարելի է ծանոթանալ այստեղ՝ http://www.armacad.info/archives/9607
Գիտաժողովը կազմակերպել է «Իրան և կովկաս» միջազգային արևելագիտական հանդեսը և Brill Academic Publishers-ը (Լեյդեն, Հոլանդիա www.brill.nl/ic)՝ համագործակցությամբ Իրանագիտության կովկասյան կենտրոնի (Երևան) և Ակադեմիական համագործակցության և օժանդակության հայկական ԱՐՄԱԿԱԴ ասոցիացիայի (Երևան) (www.armacad.info)։
Հատկանշական է, որ կոնֆերանսի կազմակերպչական աշխատանքները սկսվել են ավելի քան ութ ամիս առաջ, և աշխարհի անխտիր բոլոր իրանագիտական, կովկասագիտական և ավելի լայն՝ արևելագիտական կենտրոնները տեղեկացված են եղել գիտաժողովի մասին, որոնցից շատերն էլ ներկայանում են մասնակիցներով։ Ի դեպ, գիտաժողովի կազմկոմիտեին ուղարկված հարյուր հիսունից ավելի զեկույցներից ընտրվել են մոտ վաթսունը, որոնք կներկայացվեն առաջիկա համաժողովում։
Գիտաժողովի գործընկերներն են «Հայաստանի երիտասարդական հիմնադրամը», Երևանի «Անի» հյուրանոցը, «Մաքուր ջուր» և «Բջնի» ընկերությունները։
