Մեր հարգարժան գեներալ-գնդապետը շատ ճիշտ է ասում, որ մեր դատաիրավական համակարգը երբեք չի կարելի ուղղորդել: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր, «Մարտի 1»-ի գործով նախկին փաստահավաք խմբի անդամ Անդրանիկ Քոչարյանը՝ անդրադառնալով պաշտպանության նախկին նախարար Սամվել Օհանյանի հայտարարությանը, թե չէր ցանկանա, որ դատաիրավական համակարգը ուղղորդվի և հակասահմանադրական գործունեությամբ զբաղվի:
«Չուղղորդելու մասին բազմիցս շեշտել է նաև երկրի վարչապետը: Ես կարծում եմ, որ գործընթացները գնում են քրեական գործի շրջանակներում և ուղղորդման որևէ խնդիր չեմ կարող մատնանշել»,-ասաց նա:
Ինչ վերաբերում է հայտնի գաղտալսումների թեման այս քրգործի հետ կապելուն, Անդրանիկ Քոչարյանն ասաց. «Դա այն ճանապարհը չէ, որ պետք է հրապարակային իրականացնել: Գնում է նախաքննություն: Եվ պարոն Օհանյանը, և իր փաստաբանները կարող են տարբեր միջնորդություններով ի հայտ բերեն այն հանգամանքները, որոնք հիմք են հանդիսացել այդ մեղադրանքի համար: Առավել ևս, ես շատ կուզեի, որ այն ժամանակ 0038 հրամանի հետ առնչություն ունեցող զինվորականությունը, եթե կան այնպիսիք, որոնք ունեցել են մասնակցություն և նախաքննության հետ չեն համագործակցում, ուշքի գան և ունենանա այնպիսի համագործակցության մակարդակ, որպեսզի պպարզ լինի, թե ընդհանրապես ուժային բաղադրիչի ներգրավման առումով բանակն ինչպես եղավ, որ ներգրավվեց ներքաղաքական գործընթացներում»,-ասաց նա:
