ԱՄՆ-ը վերջին տարիներին մոտ 10 մլրդ դոլար է ծախսել Աֆղանստանում թմրանյութերի արտադրության դեմ պայքարի վրա, սակայն որևէ լուրջ հաջողություն այդ ուղղությամբ այդպես էլ ձեռք չի բերվել: Այս մասին CNN-ին տված հարցազրույցում ասել է Աֆղանստանի վերակառուցման հարցերով ԱՄՆ գլխավոր տեսուչ Ջոն Սոպկոն:
«Մենք Աֆղանստանում վերակառուցման վրա ծախսել ենք ավելի քան 100 մլրդ դոլար՝ ավելին, քան որևէ այլ երկրի վրա մեր հանրապետության գոյության ողջ ընթացքում»,- նշել է տեսուչը: Նրա խոսքով՝ ներկայում իրենք Աֆղանստանի վրա ծախսում են կրկնակի ավելի, քան Եգիպտոսի, Պակիստանի և Իսրայելի վրա միասին վերցրած:
Նրա խոսքով՝ իրենք անհաջողություն են ունեցել թմրանյութերի արտադրության դեմ պայքարում: Սոպկոն նշել է, որ Աֆղանստանում թափ են հավաքում քրեական խմբավորումները, որոնք զբաղվում են թմրանյութերի արտադրությամբ ու դիմակայում երկրի իշխանություններին: «Եթե մենք միջոցառումներ չձեռնարկենք նրանց դեմ, ապա ենթարկված ենք վերջին 12 տարիներին ձեռք բերվածը կորցնելու ռիսկին»,- ասել է Սոպկոն: