«Առաջին լրատվական»-ի հարցին՝ ի՞նչն է պատճառը, որ վերջին շրջանում որոշակի գործերով ներգրավված փաստաբանների հանդեպ կա անհանդուրժողականության մթնոլորտ, Փաստաբանների պալատի խորհրդի անդամ, փաստաբան Կարեն Մեժլումյանը պատասխանեց․ «Ինձ թվում է՝ այդ անհանդուրժողականությունը գալիս է պաշտպանյալների նկատմամբ անհանդուրժող վերաբերմունքից։ Իհարկե, ցավալի է, որ նույն վերաբերմունքը, կամ դրա ավելի մեղմ չափերը սկսվել են կիրառվել փաստաբանների նկատմամբ։ Սակայն այն միջազգային կոնվենցիոն դրույթների ուղղակի խախտում է, և մեր հասարակությունը պետք է ճիշտ ընկալի փաստաբանի աշխատանքը, որը միանշանակ իրավապաշտպան գործունեություն է։ Եթե փաստաբանը որևիցե մեկին պաշտպանում է, ապա նա իր պրոֆեսիոնալ աշխատանքն է կատարում։ Օրենքով էլ է սահմանվում, որ երբեք փաստաբանին չպետք է նույնացնել իր հաճախորդի, իր պաշտպանյալի հետ»։
Իսկ փաստաբան Արմինե Ֆանյանը հավելեց․ «Խնդիրը, կարծում եմ՝ այն է, որ փաստաբանը նույնացվում է իր պաշտպանյալի հետ։ Սա ամենամեծ խնդիրն է մեր հասարակության գիտակցության մեջ։ Կարծում եմ՝ առաջին բանը, որ պետք է հասցնել հասարակությանը՝ փաստաբանը պաշտպանում է անձի իրավունքը, այլ ոչ թե կոնկրետ անձին։ Այսօր ցուցարարների հետ պարոն Զորաբյանի հանդիպումն էի նայում ու հասկացա, որ ցուցարարների մոտ վրդովմունք է առաջացնում, որ փաստաբանը պաշտպանում է հենց այդ անձին։ Ես կարծում եմ, որ հասարակությանը առաջին հերթին պետք է բացատրել, որ փաստաբանը պաշտպանում է միայն անձի իրավունքները, այլ ոչ թե տվյալ անձին»։
Ամբողջությամբ՝ տեսանյութում։
