Այսօր՝ 2019 թվականի հունվարի 14-ին, մեկնարկեց 7-րդ գումարման Ազգային ժողովի առաջին նստաշրջանը: «Բարգավաճ Հայաստան» խմբակցության կողմից ԱԺ փոխնախագահի ընդդիմադիր թեկնածու առաջադրվեց Վահե Էնֆիաջյանը:
«Լուսավոր Հայաստան» կուսակցության քարտուղար Գևորգ Գորգիսյանը, դիմելով Էնֆիաջյանին, նշեց, որ նա մեկ ամիս առաջ քաղաքական բանավեճերը տեղափոխել է միջանձնային վիրավորանքների դաշտ. «Ինչո՞վ մենք վստահ լինենք, որ դուք ձեր լծակները չեք օգտագործելու և դրսևորելու եք քաղաքական հասունություն. կա՞ որևէ երաշխիք»:
Էնֆիաջյանը պատասխանեց, որ իրենք համարժեք են գործում, եթե կոշտ է իրենց քաղաքական թիմի նկատմամբ վերաբերմունքը, բնականաբար իրենց կողմից նույնքան կոշտ արձագանք է լինում:
Գևորգ Գորգիսյանն էլ նկատեց. «Փաստորեն դուք պնդում եք, որ պատրաստ եք նույն ոգով շարունակել և քաղաքական բանավեճերը ինչ-որ մի փուլում տեղափոխել անձնական դաշտ և ձեր բոլոր լծակները և, ինչու չէ, դեռևս լիարժեք չհերքված ֆեյքերի բանակն օգտագործել միջանձնային հարաբերություններ պարզելու, վիրավորանքներ տարածելու և անհանդուրժողականության ճառեր հղելու մեջ»:
Մանրամասները՝ տեսանյութում:
