Ռոբերտ Քոչարյանին գրավի դիմաց ազատ արձակելու վերաբերյալ միջնորդությունը քննող դատավոր Նելլի Բաղդասարյանն այսօր ինքնաբացարկ հայտնեց: Այսպիսով՝ Երևանի ընդդհանուր իրավասության դատարանը՝ նախագահությամբ դատավոր Նելլի Բաղդասարյանի, բավարարեց Ռոբերտ Քոչարյանի գործով քննիչ Հրաչ Մուշեղյանի և դատախազների կողմից ներկայացված միջնորդությունը:
Թեմայի շուրջ «Առաջին լրատվական»- ի հետ զրույցում փաստաբան, Ռ. Քոչարյանի պաշտպան Հայկ Ալումյանը նշեց, որ այս որոշումը սպասելի էր: «Արդեն գործը պետք է փոխանցվի ուրիշ դատավորի, իսկ թե երբ կքննվի հարցը, մեզ համար անհայտ է»: Հարցին, թե ինչու դատարանը գնաց այս քայլին, Հ. Ալումյանը պատասխանեց. «Յուրաքանչյուր դատավոր այս գործով իրեն մեծ ճնշման տակ է զգում, և որքան հիմնավոր են մեր միջնորդությունները, այնքան ավելի մեծ ճնշման տակ է իրեն զգում դատավորը: Կարծում եմ՝ դատավորները ճնշման տակ են ներկա գործադիր իշխանության կողմից: Դրա ապացույցներն են վարչապետի կողմից հրապարակում հնչած սպառնալիքները դատավորի հասցեին, ՀՔԾ պետի և ԱԱԾ տնօրենի հեռախոսային խոսակցությունները, դրանց վերաբերյալ վարչապետի մեկնաբանությունները: Սոցիալական ցանցերում ատելություն է սերմանվում այն դատավորների հանդեպ, ովքեր կհամարձակվեն Ռ. Քոչարյանի օգտին կայացնել դատական ակտ: Այսօր իշխանությունը վայելում է մեծ թվով մարդկանց համակրանքն ու վստահությունը, և չպետք է անտեսել հասարակական հսկայական ճնշումը, որ դատավորները զգում են իրենց վրա»:
«Դատավոր Ազարյանը Վերաքննիչ դատարանում ազատ արձակեց Ռ. Քոչարյանին՝ դեմ գնալով ներկա իշխանության և հասարակության մեծ զանգվածների ցանկություններին, և նրա դեմ մեծ արշավ հրահրվեց: Ազարյանն այն դատավորն է, որ նաև նախորդ իշխանություններին էր դեմ գնացել: Նա կայացնում է այն դատական ակտը, որը ճիշտ է համարում՝ չենթարկվելով ճնշումների, բայց ամեն մարդ չի կարող դատավոր Ազարյան լինել»,- նշեց փաստաբանը՝ հավելելով՝ ես չեմ կարող մեղադրել դատավորին, որ չուզեց այս գործը քննել:
Մանրամասն՝ տեսանյութում: