ՀՀ տրանսպորտի և կապի նախարար Մանուկ Վարդանյանն աշխատանքային այցով եղել է Գեղարքունիքի, Տավուշի մարզերում և տեղում ծանոթացել ճանապարհաշինական մի շարք ծրագրերով իրականացվող աշխատանքներին: Այս մասին ասվում է ՀՀ տրանսպորտի և կապի նախարարության տարածած հաղորդագրությունում։
Նախարար Մ.Վարդանյանը եղել է Սևան-Մարտունի-Գետափ միջպետական նշանակության ավտոճանապարհի կմ 2+700-կմ 5+200 հատվածում, որտեղ արդեն ավարտվել են հողային պաստառի աշխատանքները, ներկայումս տեղադրվում է ավազակավճային շերտը, որից անմիջապես հետո կսկսվեն ասֆալտապատման աշխատանքները: Մ.Վարդանյանը ծանոթացել է նաև ՀՀ կառավարության կողմից հրատապ հիմնանորոգում պահանջող մի շարք ճանապարհահատվածներում իրականացվող շինաշխատանքներին, այդ թվում՝ Երևան-Սևան-Իջևան 105-րդ կմ-ում, որտեղ վերականգնվում է ստորին հենապատը, Ծաղկաձորի մարզահամալիր 11-րդ կմ-ում, որտեղ արդեն վերանորոգվում է սողանքային տեղամասը:
Նախարարի ուշադրության կենտրոնում է եղել նաև Ասիական զարգացման բանկի աջակցությամբ ֆինանսավորվող՝ Գյուղական ճանապարհների ծրագրի շրջանակներում տնտեսված միջոցների հաշվին այս տարի սկսված Անտառամեջ-Զորավանք–Դպրաբակ–Այգուտ–Մարտունի–Գետիկ–Թթուջուր–Ճամբարակ–Աղբերք միջպետական ավտոոճանապարհի կմ 15+240-կմ 48+725 (Դպրաբակ-Աղբերքի խաչմերուկ) 33.5 կմ երկարությամբ հատվածի վերականգնումը: Ճանապարհի վերանորոգման համար կնքվել է 6 պայմանագիր՝ 3.412 մլրդ դրամ ընդհանուր գումարով:
Ճանապարհահատվածի վերականգնման շինարարական աշխատանքներն իրականացվում են «Իջևանի ՃՇՇ» ՓԲԸ-ի, «Կապավոր» ՍՊԸ-ի, «ԱԱԲ Պրոյեկտ» ՍՊԸ-ի, «Խաչհար» ՍՊԸ-ի և «Ճամբարակի ՃՇՇՁ» ԲԲԸ-ի կողմից:
Շինարարական աշխատանքների ավարտը նախատեսված է մինչև 2011 թ. օգոստոսի 31-ը:
Նախարարն այցելել է նաև Համաշխարհային բանկի և Ասիական զարգացման բանկի վարկային միջոցներով մի շարք ծրագրերով վերանորոգվող այլ ճանապարհահատվածներ:
