ՀՀ Սահմանադրության եւ ՀՀ ԱԺ կանոնակարգ օրենքի համաձայն՝ Բարգավաճ Հայաստան կուսակցությունը, որպես խորհրդարանում ներկայացված մեծությամբ երկրորդ քաղաքական ուժ եւ պատգամավորների քանակով ամենամեծ ընդդիմադիր խմբակցություն՝ 7-րդ գումարման Ազգային ժողովի անդրանիկ նիստի ժամանակ ներկայացնելու է ԱԺ նախագահի տեղակալի թեկնածություն: Այս մասին Facebook-ի իր էջում գրել է ԲՀԿ նախագահ Գագիկ Ծառուկյանի մամուլի խոսնակ Իվետա Տոնոյանը:
«ԲՀԿ քաղաքական խորհուրդն այս պահին քննարկում է թեկնածուի հարցը եւ առաջիկայում այն կներկայացնենք հանրությանը»,-նշել է նա:
Ավելի վաղ NEWS.am-ը հայտնել էր, որ Ազգային Ժողովի երրորդ ընդդիմադիր փոխնախագահի պաշտոնում «Լուսավոր Հայաստան» խմբակցություն մտադիր է առաջադրել Մանե Թանդիլյանի թեկնածությունը: Այս մասին նշել էր, «Լուսավոր Հայաստան» կուսակցությունից պատգամավոր ընտրված Անի Սամսոնյանը:
Հիշեցնենք, որ Ազգային ժողովն իր կազմից ընտրում է Ազգային ժողովի նախագահ եւ նրա երեք տեղակալ: Տեղակալներից մեկն ընտրվում է ընդդիմադիր խմբակցությունների կազմում ընդգրկված պատգամավորների թվից: Ազգային ժողովի նախագահը եւ նրա տեղակալներն ընտրվում եւ հետ են կանչվում պատգամավորների ընդհանուր թվի ձայների մեծամասնությամբ:
Հատկանշական է, որ այս դեպքում «Իմ քայլը» դաշինքից է կախված լինելու, թե ԱԺ մյուս երկու ուժերից որ մեկի ներկայացուցիչը կընտրվի ԱԺ փոխնախագահ:
