ՌԴ նախագահ Վլադիմիր Պուտինին իր ավանդական տարեվերջյան մամուլի ասուլիսի ժամանակ նաև անձնական կյանքին վերաբերող հարց են ուղղել: Մասնավորապես՝ լրագրողներից մեկը հետաքրքրվել է, թե երբ է պատրաստվում Վլադիմիր Պուտինն ամուսնանալ և ում հետ:
«Դե, դրանք երկու տարբեր հարցեր են»,- կատակել է նախագահը՝ հետաքրքրվելով, թե ամուսնացա՞ծ է արդյոք իրեն հարց ուղղող լրագրողը:
Դրական պատասխան ստանալով Պուտինը կրկին կատակել է. «Նա ամուսնացած է և ցանկանում է, որ ինձ մոտ էլ լինի այնպես, ինչպես իր մոտ է»:
«Թեև որպես բարեպաշտ մարդ՝ ես վաղ թե ուշ ստիպված եմ լինելու դա անել»,- ժպիտով հավելել է ՌԴ առաջնորդը:
Այս տարի ավանդական ասուլիսին հավատարմագրվել է 1702 լրագրող, ինչը ռեկորդային ցուցանիշ է: Հայտնի է, որ անցյալ տարի Պուտինի հետ ասուլիսին հավատարմագրվել է 1640 լրագրող՝ ռուսական և միջազգային տարբեր լրատվամիջոցներից, իսկ նվազագույն շեմը, որ երբևէ գրանցվել է ՌԴ առաջնորդի տարեվերջյան ասուլիսի ժամանակ, եղել է 1250:
