Պերուն մեկընդմիշտ փակել է իր սահմանների զատման հարցը Չիլիի հետ՝ ծովային տարածքի վեճի վերաբերյալ Հաագայի դատարանի վճռի կայացումից հետո: ITAR-TASS-ի փոխանցմամբ՝ այս մասին Հավանայում հայտարարել է Պերուի նախագահ Օլյանտա Ումալան Լատինաամերիկյան և կարիբյան երկրների համագործակցության (CELAC) գագաթնաժողովի ժամանակ:
ՄԱԿ-ի միջազգային դատարանը հունվարի 27-ին նշագծել է նոր ծովային սահման Չիլիի ու Պերուի միջև՝ վերջինիս տալով մոտ 50 հազար քառակուսի կմ մակերեսով խաղաղօվկիանոսյան ջրատարածք: Այդ որոշումն Ումալան անվանել է «խաղաղության հաղթանակ»:
«Մենք համոզված ենք, որ տարածաշրջանում ներկա և ապագա մարտահրավերներին դիմակայելու լավագույն միջոցը ջանքերի միավորումն է»,- ասել է նա: Խոսելով իր երկրի վիճակի մասին՝ նա ընդգծել է, որ Պերուն կշարունակի գնալ ժողովրդավարության և տնտեսական աճի ուղով՝ ակտիվ ուշադրություն դարձնելով տարածաշրջանային ինտեգրմանը:
Վերջին 12 ամիսներին Կուբան զբաղեցրել է CELAC-ի ժամանակավոր նախագահի պաշտոնը: Ռոտացիոն կարգով նախագահությունը կփոխանցվի Կոստա Ռիկային: Համագործակցության կազմում ներառված են Արևմտյան կիսագնդի 33 անկախ պետություններ՝ բացառությամբ ԱՄՆ-ի ու Կանադայի: