«Ես ձեզ հավատացնում եմ՝ եթե Ադրբեջանը համոզված լիներ, որ ինքը պատրաստ է պատերազմի, ապա շփման գծում սադրանքները, որոնք մենք այսօր տեսնում ենք, ավելի մեծ մասշտաբների կլինեին»,- Երևան-Մոսկվա տեսակամուրջի ընթացքում պատասխանելով հարցին, թե պատերազմի վերսկսման դեպքում Ադրբեջանի անընդհատ մեծացող ռազմական բյուջեն կօգնի՞ վերջիններիս հաղթել, նշեց «Եվրոպական ինտեգրացիա» կազմակերպության ղեկավար, քաղաքագետ Կարեն Բեքարյանը:
Նա նշեց, որ Ադրբեջանին ինչ-որ կերպ հաջողվել է միջազգային հանրությանը և միջնորդներին «վաճառել» այն դիրքորոշումը, թե մեծ փոխզիջում է իր կողմից պատերազմի չգնալը, ինչն էլ խանգարում է կարգավորման գործընթացին:
Բեքարյանի կարծիքով՝ պետք է հնարավորություն տալ, որ հակամարտության կողմերն ուղղակի իրար հետ բանակցեն. «Պետք է Ադրբեջանը խոսի Ղարաբաղի հետ, և դրա համար պիտի սահմանվի որոշակի ժամանակ, ասենք՝ 1-2 տարի։ Եթե այդ ընթացքում ոչ մի համաձայնության չգան, պետք է ճանաչել Ղարաբաղը, և վերջ»։
ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովն էլ նկատեց, որ եթե Ադրբեջանը պատրաստ լիներ փոքր, բայց հաղթանակաբեր պատերազմի, ապա շատ հնարավոր է, որ դիմեր այդ ճանապարհին. «Սակայն հաշվի առնելով ստեղծված իրավիճակը, հաշվի առնելով միջազգային հանրության դիրքորոշումը՝ նույն դովիլյան հայտարարությունը նման բան թույլ չի տալիս Ադրբեջանին, և պատերազմի մասին խոսակցությունները պարզապես Ադրբեջանի ներքին հռետորաբանություն է, որին անհրաժեշտ է ադեկվատ արձագանքել»:
Սևծովյան-կասպիական տարածաշրջանի քաղաքական և սոցիալական հետազոտությունների կենտրոնի նախագահ Վլադիմիր Զախարովն էլ նշեց, որ պատերազմը ոչ մեկին պետք չէ, այն պետք է Ալիևին. «Սակայն մյուս կողմից՝ Ալիևն էլ է հասկանում, որ պատերազմական գործողություններ սկսելով անմիջապես ագրեսոր կդառնա միջազգային հանրության աչքում: Դա նրան պետք չէ, նա ցանկանում է որպես խաղաղապահ հանդես գալ»:
Այդուամենայնիվ, Զախարովը նշեց, որ պատերազմի վերսկսման դեպքում Ռուսաստանը կմիջամտի, քանզի Հայաստանը ՀԱՊԿ անդամ է:
Ռուսաստանի Քաղաքական կոնյունկտուրայի կենտրոնի գլխավոր տնօրեն Սերգեյ Միխեևն էլ նկատեց, որ Ռուսաստանը չի միջամտելու, որովհետև Ռուսաստանը չի ուզում պատերազմ սկսել, Ռուսաստանն այժմ ամեն ինչ անում է, որ խաղաղություն լինի: Նրա խոսքերով, պատերազմը շատ ծանր հետևանքներ է ունենալու հակամարտության բոլոր կողմերի համար, ինչպես նաև կսրի Հայաստանի և Ադրբեջանի ներքաղաքական իրավիճակը:
Ռազմավարական մշակույթի ռուսական հիմնադրամի փոխնախագահ Անդրեյ Արեշևի գնահատմամբ էլ՝ պատերազմը որևէ արդյունք չի տա, և պետք է փորձել բանակցային գործընթացներն ավելի բաց դարձնել հասարակությունների համար.
«Կազանյան ձախողման պատճառներից մեկն էլ այն էր, որ կողմերը չէին նախապատրաստել իրենց հասարակություններին խաղաղության»: