«Պատգամավոր լինելն առաքելություն է. պատրաստվում եմ ակտիվ պատգամավոր լինել, որպեսզի մեր ընտրողները մեր աշխատանքի արդյունքում հուսախաբված չզգան իրենց»,- այս մասին «Առաջին լրատվական»- ի հետ զրույցում ասաց «Իմ քայլը» դաշինքից ընտրված պատգամավոր Էդգար Առաքելյանը: Նրա գնահատմամբ՝ անկասկած, բավականին որակյալ խորհրդարան ենք ունենալու. «Մենք պետք է յուրաքանչյուր քաղաքացու շունչը, կարիքները զգանք, և մատներս զարկերակից չպետք է վերցնենք, պետք է փորձենք իրականությանը համարաժեք արձագանքել և գործել»:
Անդրադառնալով հետընտրական զարգացումներին՝ ԲՀԿ-ի և «Լուսավոր Հայաստանի» փոխհրաձգություններին, Է. Առաքելյանը նշեց. «Կարող ենք ենթադրել, թե առաջիկա առնվազն մի քանի ամիսներին ինչ է սպասվում, իհարկե կախված է նրանից, թե այդ կուսակցություններն ինչքան հեռու կգնան փոխհրաձգություններում, որ պահին կանգ կառնեն վերջապես: Չեմ կարծում, թե այդ կուսակցությունների անդամներին հաճելի է այդպես երկար շարունակել: Ամեն դեպքում կյանքն առաջ է գնալու, կառավարությունն աշխատելու է, անընդհատ քննադատելու և ակտիվ ընդդիմադիր աշխատանքի խնդիր է առաջանալու: Չեմ կարծում, թե այդ կուսակցությունները սահմանափակվելու են իրար վրա ցեխ շպրտելով, ուշ թե շուտ կունենանք ընդդիմադիր ԲՀԿ և ընդդիմադիր «Լուսավոր Հայաստան»: Երևի դեռ կա Երևանի ավագանու ընտրությունների վախը, երբ այդ կուսակցությունները գնացին այլ ճանապարհով, երևի դասեր են քաղել, հիմա փորձում են ավելի զգուշավոր լինել:
Մեր խմբակցությունը շահագրգռված չէ, որ կառավարությունն ինչ էլ անի, դա մնա առանց քննադատության ու առանց ընդդիմախոսության, դա նոնսենս է, այդպես չի կարող լինել, մենք շահագրգռված ենք ունենալու առողջ ընդդիմություն: Քանի որ Հայաստանում իրավիճակ է փոխվել, չունենք ավտորիտար ռեժիմ, չունենք ժողովրդավարության, մարդու իրավունքների և կոռուպցիայի հետ կապված խնդիրներ, որոնք եղել են, այս պահին արմատական ընդդիմության անհրաժեշտությունն էլ վերացած է: Ցանկացած ընդդիմություն գործելու է համակարգային շրջանակներում, նաև իրենց մանդատների շրջանակներում: Թե՛ ԲՀԿ-ն, թե՛ «Լուսավոր Հայաստանը» այսպիսի իրավիճակում իրենց զգալու են ինչպես ձուկը ջրում: Հայաստանում, ուզենք-չուզենք, կլասիկ քաղաքական դաշտ է ձևավորվելու»:
Մանրամասն՝ տեսանյութում:
