2020թ. նախագահական ընտրություններում ԱՄՆ գործող նախագահ Դոնալդ Թրամփի վերընտրվելու համար լուրջ վտանգ կարող է հանդիսանալ ոչ թե դաշնային հետաքննությունները, այլ երկրում հնարավոր տնտեսական անկումը, հաղորդում է Associated Press-ը:
Այսպես, Dow Jones արդյունաբերական ինդեքսը շաբաթվա սկզբից կրկին նվազել է: Վերջին նվազումը պայմանավորված էր Թրամփի առևտրային պատերազմի հետ կապված լարվածությամբ, տոկոսադրույքների աճով և համաշխարհային էկոնոմիկայի տեմպերի դանդաղեցման մտավախությամբ:
AP-ն նշում է, որ չնայած Միացյալ Նահանգների առաջնորդը շարունակում է խոսել ԱՄՆ-ի տնտեսական հզորության մասին, նա բազմիցս հրապարակայնորեն մեղադրել է Դաշնային պահուստային համակարգի նախագահ Ջերոմ Փաուելին տոկոսադրույքների բարձրացման համար, ինչն, ըստ նրա, կարող է դանդաղեցնել տնտեսությունը:
Թրամփի պաշտոնավարման ընթացքում ամերիկյան տնտեսությունը ուժեղ էր, հաղորդում է գործակալությունը: Այնուամենայնիվ, տնտեսական աճի վերաբերյալ լավատեսությունը նվազել է ԱՄՆ-ի և Չինաստանի միջև առևտրային պատերազմ սկսվելուց հետո, ինչն ազդել է շուկաների վրա:
