ԵՊՀ իրավագիտության ֆակուլտետի դեկան, իրավաբանության գծով ԲՈՀ-ի մասնագիտական խորհրդի նախագահ, Արդարադատության խորհրդի անդամ Գագիկ Ղազինյանը «Առաջին լրատվական»-ի հետ զրույցում հերքեց տեղեկությունն այն մասին, որ մի քանի օրից որոշ պաշտոնյաների զավակներ՝ ԱԺ նախագահ Հովիկ Աբրահամյանի որդին՝ Արգամ Աբրահամյանը, ԲՀԿ-ական պատգամավոր Կարո Կարապետյանի՝ Յուվեցի Կարոյի որդին և Արսենյան Աշոտի դուստրը պատրաստվում են իրավագիտությունից թեկնածուական պաշտպանել:
«Արսենյանի դուստրը պաշտպանել է նախորդ տարի մեր խորհրդում, Իսկ Հովիկ Աբրահամյանի և մյուսի մասին որևէ տեղեկություն չունեմ: Համենայն դեպս, մեզ մոտ ձևակերպված չեն, նկատի ունեմ՝ համալսարանն ու ֆակուլտետը, ո՛չ հայցորդի, և ոչ էլ ասպիրանտի կարգավիճակ չունեն, որ նրանց իրավունք կտար պաշտպանելու»:
ԲՈՀ-ի նախագահ Լիլիթ Արզումանյանը նույնպես «Առաջին լրատվական»-ի հետ զրույցում ասաց, որ իրենք նշված անձանց վերաբերյալ որևէ տեղեկություն չունեն, նշված անձինք որևէ աշխատանք չեն ներկայացրել պաշտպանության համար:
Հիշեցնենք, որ «Հրապարակ»-ն այսօր գրել էր, որ մոտ 20 օրից ԵՊՀ-ում իրենց թեկնածուականները կպաշտպանեն ոչ միայն Աբրահամյան Արգամը` Արգամիչի որդին, այլև ԲՀԿ-ական Յուվեցի Կարոյի ուստրը` Վիլիկը, ՀՀԿ-ական` Ջերմուկի Աշոտի դուստրը: Նրանք բոլորը մարտնչում են իրավական ասպարեզում, և թեկնածուական թեզերն էլ, բնականաբար, Հայաստանում ամենաչկայացած ոլորտից՝ իրավաբանությունից են: «Հրապարակ»-ի աղբյուրը նշել էր որ՝ «դե, Ղազինյանն է, էլի, բիրիքով կպցրել ա»:
