2011 թ. հունիսի 28-ին ԵՄ պատվիրակության ղեկավար Դեսպան Ռաուլ դե Լուցենբերգերի և ՀՀ ազգային անվտանգության խորհրդի Քարտուղար Արթուր Բաղդասարյանի նախագահությամբ տեղի է ունեցել Եվրամիության Խորհրդատվական խմբի Խորհրդի վեցերորդ նիստը: ԵՄ Խորհրդատվական խումբը ներկայացրել է եռամսյակային հաշվետվությունը, Կարիքների գնահատման հաշվետվությունը և 2011թ. հունիսից 2012թ. մայիս ամիսների համար նախատեսված աշխատանքային ծրագիրը, որոնք հաստատվել են Խորհրդի կողմից:
Բացելով Խորհրդի նիստը՝ ՀՀ ազգային անվտանգության խորհրդի Քարտուղար Արթուր Բաղդասարյանը կառավարության անունից գոհունակության խոսք է հայտնել ԵՄ Խոհրդատվական խմբի գործունեության մասին և շեշտել այն կարևոր աշխատանքները, որոնք Խումբն իրականացրել է տնտեսության, օրենքի գերակայության, մարդու իրավունքների և ինստիտուցիոնալ զարգացման ոլորտներում ընթացող բարեփոխումների գործընթացում:
ԵՄ պատվիրակության ղեկավար պրն Ռաուլ դե Լուցենբերգերը նշել է, որ Ասոցացման համաձայնագրի շուրջ բանակցային գործընթացով Եվրամիությունն ու Հայաստանը մտել են հարաբերությունների նոր փուլ: «ԵՄ Խորհրդատվական խումբը կշարունակի տրամադրել քաղաքականության հարցերով խորհրդատվություն, որը կնպաստի այս սերտ հարաբերությունների հետագա զարգացմանը: Եվրամիությունը պատրաստ է աջակցել Հայաստանին ԱՀ շուրջ բանակցային գործընթացին առնչվող բարեփոխումների և ազգային առաջնահերթությունների իրականացման ուղղությամբ», – ավելացրել է նա:
Խորհրդի նիստի ժամանակ քննարկվել է Կարիքների գնահատման հաշվետվությունը, որտեղ ներկայացվել է ընթացիկ ու ցանկալի իրավիճակի միջև բացերի վերլուծությունը և առաջարկվել են հետագա գործողությունների հիմնավորումները: Հանդիպման ընթացքում քննարկվել է Խորը և համապարփակ ազատ առևտրի համաձայնագրի ոլորտի գերխնդիների ուղղությամբ ԵՄ Խորհրդատվական խմբի կողմից տրամադրվող օժանդակության կարևորության մասին:
Խորհուրդը ողջունել է Ազատ տեղաշարժի գործընկերություն ձևավորելու, ինչպես նաև ԵՄ-Հայաստան մուտքի արտոնագրերի հեշտացման և ռեադմիսիայի համաձայնագրի շուրջ հետագա բանակցությունների ուղղությամբ ձեռնարկված քայլերը: Այլ խնդիրների շարքում կարևորվել են ԵՄ քաղաքական ընտանիքներում ՀՀ քաղաքական կուսակցությունների ինտեգրման գործընթացի հեշտացման, դիվանագիտական ակադեմիայի կայունության ապահովման և տեղական փորձագետների համալրման աշխատանքները:
Նիստին մասնակցել են ՀՀ Նախագահի աշխատակազմի, ՀՀ կառավարության և ՀՀ ազգային ժողովի բարձրաստիճան պաշտոնյաներ: Ներկա էին նաև ԵՄ անդամ պետությունների դեսպանատների և միջազգային կազմակերպությունների, այդ թվում՝ ՄԱԶԾ ներկայացուցիչներ: ԵՄ Խորհրդատվական խումբը ներկայացնում էին թիմի ղեկավար պրն Անտտի Հարթիքայնենը և ԵՄ խորհրդատուները: