ՀՀ ԶՈւ կազմավորման 22-րդ տարեդարձին նվիրված հանդիսավոր նիստին պաշտպանության նախարար Սեյրան Օհանյանն իր շնորհավորական ելույթում նշեց. «Կռվելուն զուգընթաց՝ բանակ ստեղծեցինք: Զինադադարին հաջորդած 20 տարիների ընթացքում հզորացրինք այն, և այսօր հայկական բանակը ոչ միայն արժանացել է աշխարհի բանակների հարգանքին, այլև իրավամբ վաստակել հայ ժողովրդի սերն ու վստահությունը, որովհետև նրա հզորությունն այլևս դարձել է Հարավային Կովկասում խաղաղության և կայունության պահպանման խոշորագույն երաշխիքներից մեկը»,-ասաց նախարարը՝ հավելելով, որ հայ զինվորին վստահվել է խաղաղապահ առաքելություն իրականացնել արտաքին ու ներքին հակասություններից բզկտվող թեժ կետերում:
Նա նշեց, որ մեծ հաջողություն է արձանագրվել նաև միջազգային պաշտպանական ասպարեզում և ամրապնդվել հայկական կողմի ձեռքբերումների իրավապայմանագրային ապահովումը՝ ընդամենը մեկ տարում կնքելով միջկառավարական և միջգերատեսչական շուրջ 30 համաձայնագիր և պայմանագիր:
Նրա խոսքով՝ ամեն տարեմուտին պարզվում է, որ ժամանակն իզուր չենք կորցրել: Հայկական բանակի տարեգրության մատյանում դատարկ էջեր չենք թողել, այլ հզորացրել, ամրապնդել ենք սահմանների պաշտպանությունը, կատարելագործել հայ զինվորի և սպայի ունակությունները:
«Անհնար է բոլոր բացասական երևույթները մեկ օրում վերացնել, առավել ևս, երբ դրանք հաճախ ունենում են օբյեկտիվ և խորքային պատճառներ»,-ասաց նախարարը՝ հավելելով, որ 2013-ին այս ուղղությամբ կատարվել են հսկայական աշխատանքներ, ինչի արդյունքում բանակում 32 տոկոսով պակասել են արտակարգ պատահարները, ինչը նշանակում է՝ հսկայական տքնաջան աշխատանք է կատարվել:
«Մեր ուժն ու հզորությունը հենակետերում կանգնած պատանիներն են, մեր ոգին այն դիրքապահ զինվորներն են, որոնք ընդամենը յոթ օր առաջ Մարտակերտի մատույցներում 9 հոգով հակառակորդի 30 հոգանոց հատուկ ստորաբաժանում ջախջախեցին ու փախուստի մատնեցին»,- ասաց նախարարը:
