Բրյուսելում մեկնարկում է Բելգրադի և Պրիշտինայի միջև հարաբերությունների նորմալացման վերաբերյալ բանակցությունների՝ այս տարվա առաջին ռաունդը: Սերբիայի վարչապետ Իվիցա Դաչիչի և Կոսովոյի առաջնորդ Հաշիմ Թաչիի հանդիպման օրակարգում է երկրամասում սերբական քաղաքապետարանների ասոցիացիայի ստեղծումը: Այս մասին հայտնում է ITAR-TASS-ը:
Բանակցությունները կանցկացվեն ԵՄ արտաքին և անվտանգության քաղաքականության հարցերով գերագույն ներկայացուցիչ Քեթրին Էշթոնի միջնորդությամբ:
Ինչպես հայտնել են ԵՄ կենտրոնակայանում, սկզբում Էշթոնն առանձին-առանձին կհանդիպի կողմերի հետ, այնուհետև բանակցությունները կշարունակվեն համատեղ աշխատանքային հանդիպման ձևաչափով:
Նախորդ ռաունդը Բելգիայի մայրաքաղաքում անցկացվել էր դեկտեմբերի 13-ին: Չնայած այն բանին, որ 20-րդ ռաունդը սպասվող արդյունքներ չտվեց, զեկույցի բովանդակությունն ընդհանուր առմամբ դրական էր: Էշթոնը հայտարարել էր, որ Սերբիան կատարել է բոլոր պայմանները՝ ԵՄ-ին միանալու մասին բանակցություններ սկսելու համար: Դա թույլ էր տվել եվրոպացի նախարարներին՝ հունվարի 21-ին նշանակել ԵՄ-Սերբիա առաջին միջկառավարական նիստ, որը նշանավորել է անդամակցության բանակցությունների մեկնարկը: Երկրորդ հանդիպումը սպասվում է հունիսի 25-ին: Սպասվում է, որ Սերբիան ԵՄ-ին կմիանա մինչև 2020 թվականը:
