Սիրիական հակամարտությունում չկա ոչ մի փոխզիջում՝ նույնիսկ «Ժնև-2» համաժողովից հետո: Այսօր տեղի ունեցած մամուլի ասուլիսի ժամանակ այս մասին ասաց արաբագետ Արաքս Փաշայանը:
«Սիրիական ճգնաժամն ավելի ու ավելի լուրջ մարտահրավեր է նետում ոչ միայն տարածաշրջանային, այլև համաշխարհային կայունությանը: Եթե նախկինում ասվում էր, որ սիրիական խնդիրը զուտ մերձավորարևելյան է, ապա այժմ խնդիրը ներառում է այլ տարածաշրջաններ ևս: Անգամ Ադրբեջանից մեծ թվով վարձկաններ են մասնակցում սիրիական մարտերին՝ շատ հաճախ տարբեր ճակատներում պայքարելով հենց միմյանց դեմ»,- ասաց նա:
Արաբագետի խոսքով՝ միանգամայն իրատեսական է, որ ասադականները փոխզիջումների չգնան, քանի որ բավական զգալի առաջընթաց են գրանցել մարտերում, ինչպես նաև PR քայլերով միջազգային հանրության մոտ տպավորություն են ստեղծել, թե հակամարտության իրական մեղավորները զինյալներն են:
«Մեզ՝ հայերիս համար սիրիական պատերազմը վտանգավոր է գլխավորապես հայ համայնքի կրած մարդկային և գույքային վնասների տեսանկյունից: Եթե պատերազմը շարունակվի, պարզ է, որ հայ համայնքն ավելի կնոսրանա, և այլևս երբեք չենք ունենա այն գաղութը, որ ունեինք մինչ այժմ»,- ասաց Արաքս Փաշայանը:
