Այս պահին Լոս Անջելեսում ընթանում է «Գրեմմի» 56-րդ մրցանակաբաշխությունը: Մրցանակներից շատերը հանձնվել են բուն շոուից առաջ տեղի ունեցած միջոցառման ժամանակ: Միջոցառումը վարել է Սինդի Լաուպերը: Մրցանակաբաշխությունը հեռարձակվում է CBS հեռուստաալիքի ուղիղ եթերով:
«2013թ. լավագույն երգ» անվանակարգում հաղթող է ճանաչվել 17-ամյա նորզելանդացի երգչուհի Լորդը՝ Royals կոմպոզիցիայի համար: Այս հեղինակավոր անվանակարգում նրա մրցակիցներն էին Macklemore&Ryan Lewis-ը, Քեթի Փերրին, Բրունո Մարսը՝ հայտնում է RIA Novosti-ն:
Լորդն իր դեբյուտային Royals սինգլը թողարկել է 2013թ. մարտին: Երգչուհին այդ երեկո արժանացել է նաև մրցանակի «Տարվա լավագույն սոլո» անվանակարգում:
«Լավագույն ռոք կոմպոզիցիա» անվանակարգում «Գրեմմի»-ի է արժանացել Փոլ Մաքքարտնին՝ Cut Me Some Slack-ի համար: Նա բեմում հանդես է եկել The Beatles-ում իր գործընկերոջ՝ Ռինգո Սթարի հետ: Նրանք «Գրեմմի»-ի արժանացան երաժշտական արդյունաբերության մեջ ունեցած հատուկ ավանդի ու ձեռքբերումների համար:
«Տարվա ալբոմ» անվանակարգում մրցանակը հանձնվեց ֆրանսիացի էլեկտրոնային դուետին՝ Daft Punk-ի Random Access Memories-ին: Խումբը մրցանակ ստացավ նաև «Տարվա լավագույն դուետ» անվանակարգում:
«Տարվա լավագույն երաժշտական տեսագրություն» անվանակարգում «Գրեմմի»-ն բաժին ընկավ Ջասթին Թիմբերլեյքին ու Jay Z-ին՝ Suit & Tie կոմպոզիցիայի հիման վրա նկարահանված տեսահոլովակի համար:
