Հայաստանի կրթական համակարգի բարելավման նպատակով իրականացվել է հանրակրթական դպրոցների վարկանիշավորման պիլոտային ծրագիր, որի փորձնական արդյունքները, ծրագրով ուսումնական հաստատությունների գործունեության որակը պետք է չափագրվի ըստ օբյեկտիվ չափանիշների: Այս համակարգը մշակվել է 2013-ին, իսկ մեթոդաբանությունը դեռ փորձարկվում է:
Կրթության ազգային ինստիտուտի փոխտնօրեն Անահիտ Բախշյանը «Առաջին լրատվական»-ի հետ զրույցում նշեց, որ դժվարանում է գնահատական տալ իրականացվող այդ ծրագրին: «Թե վարկանիշավորման գործընթացը որքանով է համապատասխանում կարգին, օրենքի պահանջին՝ ես չգիտեմ, որովհետև վարկանիշավորման հետ կապված որևէ փաստաթուղթ չեմ տեսել, հրապարակային գործողություն չի եղել: Կարգը պահանջում էր, որ ամեն տարի մինչև սեպտեմբերի 5-ը (սկսած 2012-ի սեպտեմբերի 1-ից) դպրոցը հրապարակեր իր ներքին գնահատման արդյունքները. այսպիսի գնահատում ես չեմ տեսել ոչ մի տեղ, հետևապես՝ թե այդ ինչ պիլոտային ծրագիր է արել նախարարությունը, որտեղ է արել, որ դպրոցում, ինչ արդյունք է գրանցել՝ ես տեղյակ չեմ, ուստի չեմ կարող գնահատել»,- ասաց նա:
Բախշյանի խոսքով՝ այս գաղափարը նախատեսված է օրենքով, այն ներառված է Հանրակրթության մասին օրենքում, որում գրված է՝ 2012-ի սեպտեմբերից պետք է անցնել վարկանիշավորման գործընթացի: Դրա նպատակը, ըստ Բախշյանի, եղել է դպրոցներում ներքին գնահատման՝ ինքնագնահատական տալու կարողությունը, հմտությունները բարձրացնելը, որպեսզի դպրոցն ինքը կարողանա իրեն գնահատել, ինքնագնահատական տալ՝ ըստ սահմանված չափորոշիչների: Դա թեպետ ենթադրում է նաև մրցակցություն, բայց նաև սեփական կարողությունները, ունեցածը գնահատելու հմտություն:
«Դրա կարիքը մենք շատ ունենք, դա պետական ինքնակառավարվող մարմնին անհրաժեշտ, բայց պակասող գործառույթ է, իսկ մեր դպրոցները, որպես ՊՈԱԿ-ներ, պետք է լինեն ինքնակառավարվող. իսկ ինչքանո՞վ են իրենք իրենց կարողանում կառավարել՝ սա է հարցը:
Արտաքին գնահատումը պիտի կատարի տեսչությունը, Գիտելիքների թեստավորման կենտրոնը: Հիմա ես արտաքին գնահատման արդյունքները եթե ունեմ ձեռքիս տակ (ասենք՝ տեսչությունն իր ստուգումների արդյունքներն է հրապարակում, թեստավորման կենտրոնը՝ իր), ինձ անչափ հետաքրքիր է նաև իմ ներքին գնահատումը, որը ես չունեմ, ես չգիտեմ»,- ասաց նա:
Ըստ Բախշյանի՝ դպրոցների վարկանիշավորման պիլոտային ծրագիրը հայտնի չէ՝ որ դպրոցում է իրականացվում, որ մարզում, ուստի դա բազում անհայտներով մի լուր է, որի մասին ինքը դժվարանում է լավ կամ վատ բան ասել, քանի դեռ անհրաժեշտ տեղեկատվությունը չի հրապարակվել:
Ի պատասխան հարցի՝ այս ծրագրի իրականացման դեպքում արդյոք օբյեկտիվությունը հնարավո՞ր է ապահովել, Բախշյանը ցավով նշեց, որ դժվար է օբյեկտիվության մասին խոսել: «Պարզապես դժվար է խոսել, օբյեկտիվությունը մեր երկրում նույնպես քաղաքականացված հասկացություն է, հետևապես …. Թող հրապարակվի, հետո կտեսնենք»,- ասաց նա:
