Facebook Messenger-ում տարօրինակ խափանում է գրանցվել: Օգտատերերը ավելի վաղ ստացած հաղորդագրությունների ծանուցումներ են ստացել: Իսկ ոմանց մեսենջերը տեղեկացրել է արդեն մահացած ընկերներից ստացած հաղորդագրությունների մասին:
Բրիտանացի Ադամը Twitter-ում գրել է, որ դրա արդյունքում նա կրկին վերապրել է հարազատ մարդու կորուստը:
«Շնորհակալություն Facebook, որ ծանուցում ես ավելի քան 2 տարի առաջ ստացած հաղորդագրությունների մասին, այդ թվում նաև մահացած մարդկանցից: Ես երեկոն վախի մեջ եմ անցկացրել, ինչ է ինձ դեռ սպասվում»,- բողոքել է Ադամը:
Նույնատիպ խնդրի է հանդիպել նաև օգտատեր Մաքս Լաֆեյվը: «Հաքերներ են թե ուրվականներ»,- հարցրել է նա բաժանորդներին:
Հետագայում պարզվել է, որ այս խնդրին են բախվել տասնյակ օգտատերեր:
Facebook-ում կատարվածն անվանել են պատահականություն, գրում է Mashable-ը:
Դա տեղի է ունեցել ծրագրային ապահովման թարմացման արդյունքում, հիմա խնդիրը լիովին վերացվել է: Հայցում ենք ձեր ներողամտությունը թյուրիմացության համար, հայտարարել է ընկերության ներկայացուցիչը:
