ՀՀԿ մամուլի խոսնակ Էդուարդ Շարմազանովը ֆեյսբուքյան եթերում Նիկոլ Փաշինյանի «այլ կուսակցությունից վկաներին» խորհուրդ տվեց չմիջամտել իրենց ու վարչապետի հակադրությանը։ «Մեր գաղափարական պայքարը Փաշինյանի և նրա թիմի հետ է, կոնկրետ Փաշինյանի, և խորհուրդ կտամ մյուսներին ոտքի տակ չընկնել, իմ պայքարը իրենց քաղաքական պապայի հետ է, իրենց քաղաքական կուռքի հետ է, ոչ թե օրը վեց անգամ կարծիք փոխող որոշ քաղաքական դամբուլիզմի ներկայացուցիչների հետ, այնպես որ՝ չփորձեք գնահատականներ հնչեցնել ՀՀԿ-ի վերաբերյալ, մոռացե՞լ եք՝ ոնց էիք հերթ կանգնում ՀՀԿ-ի դռների տակ»,- ասել է նա:
Երեկ ՀՀԿ-ին Փաշինյանի «բոքսի տանձիկի» հետ համեմատել էր «Լուսավոր Հայաստան» կուսակցության նախագահ Էդմոն Մարուքյանը, ու Շարմազանովի խոսքն ըստ ամենայնի հասցեագրված էր հենց նրան։
Առաջին անգամ չէ, որ ՀՀԿ գործիչները դիմում են այս էժանագին ու պարզունակ հնարքին՝ խեղաթյուրելով իրականությունը։ Հիմա, ըստ երևույթին, ճիշտ ժամանակն է կատարելու մի քանի սկզբունքային արձանագրումներ։
Գլոբալ հարթության վրա ու նաև այս ընտրարշավում Նիկոլ Փաշինյանի ու ՀՀԿ-ի միջև հակադրություն չկա, ու դրա համար առկա են երկու շատ լուրջ պատճառներ։ Նախ՝ նրանք համազոր մրցակիցներ չեն, եթե հաշվի առնենք, որ քաղաքական հավակնությունների ձևակերպման հիմքը հասարակական վստահության ռեսուրսն է։ Երկրորդ՝ ՀՀԿ-ին միայն թվում է, թե նա քաղաքական կամ ընտրական այս գործընթացի մասնակից է, որովհետև մրցակից չէ ոչ միայն ակնհայտ ֆավորիտի, այլև նույնիսկ մյուս՝ համեմատաբար թույլ մասնակիցների համար։ Սերժ Սարգսյանի թիմն այս ընտրապայքարում միակն է, որ, տիրապետելով ահռելի ֆինանսական ու քարոզչական միջոցների, խուսափում է հասարակության հետ շփումներից՝ վերջինիս կողմից բացահայտ արհամարհանքի հետևանքով։ Քաղաքական ուժերի հզորության գնահատման միակ չափանիշը ոչ թե սեփական կարծիքն է կամ նույնիսկ կենսագրությունը, այլ հասարակության վստահության մանդատը։
Այս իմաստով ՀՀԿ-ն ընտրությունները տանուլ է տվել դեկտեմբերի 9-ից շատ ավելի վաղ՝ խույս տալով հասարակությունից։ Եթե Շարմազանովն ու ՀՀԿ մյուս գործիչները ցանկություն ունեն իրականում տեղեկանալու ՀՀԿ հնարավորությունների մասին, ապա կարող են դուրս գալ փողոց. հավատացնում ենք՝ նույնիսկ հարցախույզի անհրաժեշտւթյուն չի լինի, որովհետև մարդիկ առանց վարանելու իրենց վերաբերմունքն ակնհայտորեն ցույց կտան։
Եթե Նիկոլ Փաշինյանն իր քարոզարշավի առյուծի բաժինը նվիրում է ՀՀԿ-ին, դա ոչ թե վերջինիս արժանիքն է, այլ հեղափոխության թիմի ինստիտուցիոնալ թուլության դրսևորումը, այն բանի հետևանքը, որ ՀՀԿ-ն իսկապես «բոքսի տանձիկ» է, որի հաշվին հեշտ է հասարակություն կոնսոլիդացնելը։
ՀՀԿ-ն այս քարոզարշավին մասնակցում է ակնհայտ սաբոտաժի նպատակով, մի կողմից՝ ընտրությունների լեգիտիմության վրա ստվեր գցելու նպատակով, ինչի դրսևորումն են այս կուսակցության «մտահոգիչ» հայտարարությունները, մյուս կողմից՝ դեմոկրատական ընդդիմության ձևավորման հեռանկարը չեղարկելու նպատակով՝ քաջ գիտակցելով, որ իրական այլընտրանքի գոյությունը վերջնականապես լուսանցք կմղի հին համակարգի ներկայացուցիչներին՝ իրենց ռևանշիստական նկրտումներով։
Ինչ վերաբերում է ՀՀԿ-ի դռանը հերթ կանգնողներին, ապա թերևս Շարմազանովը նրանց պետք է փնտրի այլ ցուցակներում, նաև՝ ինչքան էլ ցավալի է, այսօրվա իշխանության, որովհետև «հերթ կանգնող» տեսակը միշտ վազում է «տաքուկ անկյուններ»՝ հետևողական պայքարով իր տեղը քաղաքական դաշտում գտնելու փոխարեն։
Եվ առհասարակ՝ ժամանակն է, որպեսզի ՀՀԿ-ն վերադառնա ադեկվատության հարթություն՝ առաջիկա ընտրություններում գոնե իր գրասենյակների աշխատակիցների քվեները չկորցնելու նպատակով։ Սեփական գրասենյակները միակ տեղն են, որտեղ այս կուսակցության թեկնածուները կարողանում են իրականացնել իրենց «մոխրագույն» քարոզարշավը, ու եթե նույնիսկ իրենց կուսակցության գրասենյակներում քվեներ չստանան, դա իսկապես կլինի «քաղաքական դամբուլիզմի» դրսևորում։
