2013թ. դեկտեմբերին մեքսիկական սուրճի արտահանումը կազմել է 159 հազար 645 պարկ (1 պարկը =60 կգ), ինչը 20.7%-ով քիչ է նախորդ տարվա համեմատ: Այս մասին հաղորդում է Reuters գործակալությունը` վկայակոչելով Amecafe սուրճ արտադրողների ազգային ասոցիացիային:
2013-2014թթ. սեզոնի առաջին երեք ամիսներին արտահանման ընդհանուր ծավալը կազմել է 458 հազար 369 պարկ, ինչը նախորդ տարվա նույն ժամանակահատվածի ցուցանիշներից քիչ է 32.3%-ով:
Սուրճի արտահանման կտրուկ նվազման պատճառը սուրճի ծառերի սնկային հիվանդության համաճարակն է: Մեքսիկայում և Կենտրոնական Ամերիկայի մի շարք երկրներում հիվանդությունը հասել է ամենաբարձր մակարդակի` 1976թ. ի վեր, երբ Pucciniales տեսակի սնկերն առաջին անգամ գրանցվեցին տարածաշրջանում:
Հիվանդությունը լրջորեն թուլացնում կամ սպանում է սուրճի ծառերը` ազդելով բերքատվության և բերքի որակի վրա:
