Անցյալ շաբաթ Երևանում մեկնարկեց «ԴիջիԹեք» Բիզնես ֆորումի և Մայքրոսոֆթ Ինովացիոն ֆորումի բացման արարողությունը, որի ժամանակ ՀՀ վարչապետ Տիգրան Սարգսյանը մի շարք հետաքրքիր թվեր ներկայացրեց ու եզրակացություններ արեց:
«ՏՏ ոլորտը, եթե գնահատենք վերջին 3 տարիների զարգացման տեմպերով, զբաղեցնում է մեր տնտեսության մեջ առաջատարի դիրքը»,- հայտարարեց Տիգրան Սարգսյանը՝ նշելով ոլորտի վերաբերյալ մի շարք ցուցանիշներ: «2009 թվականը մենք ավարտել ենք՝ ունենալով բջջային հեռախոսով ինտերնետից օգտվող 1.1 մլն բաժանորդ, 2010թ.-ն ավարտել ենք 1 մլն 343 հազար բաժանորդով, իսկ 2011թ.-ի առաջին եռամսյակն ավարտել ենք` ունենալով 1.7 մլն բաժանորդ: Եթե վերցնենք լայնաշերտ ինտերնետի հասանելիությունը, ցուցանիշները հետևյալներն են. 2009թ.-ը մենք ավարտել ենք` ունենալով 70 հազար բաժանորդ, 2010թ.-ը ավարտել ենք` ունենալով 170 հազար բաժանորդ, 2011թ.-ի առաջին եռամսյակում արդեն իսկ ունենք 240 հազար բաժանորդ: Կարևոր է, որ բաժանորդների քանակի աճն ուղեկցվում է գների նվազմամբ: Եթե վերցնենք լայնաշերտ ծառայությունների միջինացված գները՝ մինչև 1 Mb/վայրկյանում գինը, 2009թ.-ն ավարտել ենք 234 հազար դրամ գնով, 2010թ.-ը՝ 71 հազար դրամ, իսկ 2011թ.-ի առաջին եռամսյակն ավարտել ենք 55 հազար դրամ գնով»,- նշեց վարչապետը:
Նախ նշենք, որ 1.7 մլն մարդ Հայաստանում բջջային հեռախոսով ոչ թե օգտվում է ինտերնետից, այլ կարող է օգտվել: Իրականում հեռահաղորդակցության ոլորտի ընկերությունները տրամադրում են ինտերնետից օգտվելու հնարավորություն՝ անկախ նրանից` այդ հնարավորությունն օգտագործվում է, թե ոչ: Հակառակ դեպքում կստացվեր, որ Հայաստանի բնակչության բացարձակ մեծամասնությունը, ասենք՝ ցանկացած 5 մարդուց 3-ը, բջջային հեռախոսով օգտվում է ինտերնետից: Նման բան, իհարկե, չի կարող լինել:
Լայնաշերտ ինտերնետի հասանելիության վերաբերյալ թվերը իսկապես հավաստի են, դրանց ստացման մեթոդաբանությունը այնքան էլ դժվար չէ: Գների վերաբերյալ վարչապետի ներկայացրած տվյալները ևս համապատասխանում են իրականությանը: Սակայն չպետք է մոռանալ մի շատ կարևոր հանգամանք. թեև ինտերնետի որակի և մատչելիության առումով իսկապես Հայաստանը զգալի առաջընթաց է ունեցել 2010թ.-ին, սակայն աշխարհի գրեթե բոլոր երկրները շատ ավելի արագ են զարգացել այս ուղղությամբ, որի արդյունքում էլ մենք համեմատության մեջ հետ ենք մնացել: 2 ամիս առաջ Համաշխարհային տնտեսական ֆորումը հրապարակեց «Համաշխարհային տեղեկատվական տեխնոլոգիաներ 2010-2011» զեկույցը, որտեղ ցանցային պատրաստվածության ցուցիչով Հայաստանը 138 երկրների շարքում 109-րդ տեղում էր` նախորդ տարվա համեմատ 8 տեղով հետ ընկնելով: Սա այն պարագայում, երբ բացարձակ արժեքով Հայաստանի գնահատականը բարելավվել է 0.04 միավորով, այսինքն՝ Հայաստանը առաջընթաց իսկապես արձանագրել է:
Ի դեպ, երեկ մենք հարցրեցինք ՀՀ էկոնոմիկայի նախարար Տիգրան Դավթյանին, թե արդյոք ինքը բավարար համարո՞ւմ է այս ոլորտում արձանագրված աճը՝ այն պարագայում, երբ մենք աշխարհից շարունակ հետ ենք մնում: Նախարարը նշեց, որ իրենք այսուհետ հետևելու են նման ինդեքսների հրապարակման համար հիմք հանդիսացող տվյալներին, քանի որ հաճախ դրանք հնացած են լինում: Տ.Դավթյանը նշեց, որ նման խնդիր կարող է լինել նաև հենց այս ցուցիչի հետ կապված:
Ինչևէ, Տ.Սարգսյանը մեկ այլ հետաքրքիր հայտարարություն էլ արեց: «Տեղեկատվական տեխնոլոգիաների ոլորտը կառավարության կողմից դեռևս հինգ տարի առաջ հռչակվել է որպես առաջնահերթություն, ձևավորվել է խորհուրդ, որը ղեկավարում է վարչապետը, և պարբերաբար ոլորտի ներկայացուցիչների հետ տարբեր ձևաչափերով հանդիպումների ընթացքում մենք քննարկում ենք այն հարցերը, որոնք մտահոգում են ոլորտի ներկայացուցիչներին և փուլ առ փուլ լուծումներ տալով` ստեղծում ենք ավելի բարենպաստ պայմաններ ոլորտի զարգացման համար»,- նշեց վարչապետը: Սակայն նկատենք, որ հենց այդ ֆորումի կազմակերպիչ հանդիսացող Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը «Ժամանակ»-ի հետ զրույցում կասկած էր հայտնել այն առնչությամբ, որ ՏՏ ոլորտը գերակա ճյուղ է համարվում կառավարության համար (http://1in.am/arm/armenia_economy_15460.html): Ըստ Կ.Վարդանյանի՝ որևէ պետական ծրագրում հստակ նշում չկա այն մասին, որ ՀՀ-ն պետք է դառնա տեխնոլոգիական երկիր: «Կան տարբեր ուղղություններ` մեկն ասում է տուրիզմ, մյուսը` հանքարդյունաբերություն, երրորդը` գյուղատնտեսություն և այլն: Այսինքն` հստակ կողմնորոշվածություն, թե մեր երկիրը 10 տարի հետո ինչպիսին է լինելու, չկա, այդ թվում` նաև որևէ փաստաթղթում»,- ասում է Կ.Վարդանյանը:
Այսպիսով, վարչապետ Տիգրան Սարգսյանը այս անգամ ևս այնպիսի հայտարարություններ ու եզրակացություններ արեց, որոնց պետք է խիստ վերապահումներով մոտենալ: