Իրանի նախագահ Հասան Ռուհանին ասել է, որ իր երկիրը պատրաստ է վերամիավորվել համաշխարհային տնտեսության հետ այն բանից հետո, երբ Իրանը կատարել է աշխարհի տերությունների հետ ձեռք բերված միջանկյալ համաձայնությունը՝ միջուկային ծրագրի իրականացումը սահմանափակելու շուրջ: Այս մասին տեղեկացնում է «Ամերիկայի ձայնը»:
Շվեյցարիայի Դավոս քաղաքում անցկացվող համաշխարհային տնտեսական համաժողովին մասնակցող նախագահ Ռուհանին, հանդես գալով գործարար աշխարհի առաջնորդների առջև, նշել է, որ Թեհրանը «առաջ է քաշում չափավորության և խոհեմության քաղաքականություն և հույսեր ունի՝ կապված համաշխարհային տնտեսության հետ»:
Իրանի նախագահի խոսքով՝ իր երկիրն ունի գալիք 30 տարվա ընթացքում աշխարհի տնտեսապես ամենազարգացած երկրների տասնյակը մտնելու ներուժ և նախատեսում է վերսկսել տնտեսական հարաբերություններն աշխարհի այլ պետությունների հետ:
Նախագահ Ռուհանին ասել է նաև, թե «չի տեսնում որևէ լուրջ խոչընդոտ» Միացյալ Նահանգների, Ռուսաստանի, Չինաստանի, Մեծ Բրիտանիայի, Ֆրանսիայի, Գերմանիայի և Եվրամիության հետ մշտական պայմանավորվածություն ձեռք բերելու հարցում:
Նա մատնանշել է, որ Իրանի նավթի հարուստ պաշարները կարող են կարևոր դեր ունենալ աշխարհի էներգետիկական կայունության գործում:
Էներգետիկայի ոլորտում գործող կազմակերպությունների ղեկավարների հետ ունեցած հանդիպման ընթացքում նախագահ Ռուհանին խոստացել է մինչև այս տարվա սեպտեմբեր ներկայացնել Իրանում նավթի պայմանագրերին վերաբերող գրավիչ առաջարկներ:
