Եթե դեկտեմբերի 6-ին Սանկտ Պետերբուրգում ՀԱՊԿ գլխավոր քարտուղարի ընտրության հարցում կոնսենսուս չլինի, հայկական կողմը կշարունակի աշխատել կոնսենսուսի հասնելու ուղղությամբ: Այս մասին լրագրողների հետ հանդիպմանն ասել է վարչապետի պաշտոնակատար Նիկոլ Փաշինյանը։
Անդրադառնալով ՀԱՊԿ գլխավոր քարտուղարի ընտրության հարցի շուրջ Բելառուսի նախագահի և ԱԳՆ խոսնակի մակարդակով արված հայտարարություններին՝ Փաշինյանը նշել է, որ հայկական կողմը նախագահի ասածին պատասխանել է վարչապետի մակարդակով և ԱԳՆ խոսնակին պատասխանելու մտադրություն չունի. «Այս հարցում իմ զրուցակիցն անձամբ Բելառուսի նախագահն է, որից ես որևէ արձագանք չեմ ստացել։ Եվ որևէ կասկած չկա, որ այն, ինչ ասել եմ, տեղի կունենա, այսինքն՝ ես պարզաբանումներ կպահանջեմ տեղի ունեցածի վերաբերյալ»,- ասել է Նիկոլ Փաշինյանը:
Թեմայի շուրջ «Առաջին լրատվական» -ի հետ քննարկմանը մասնակցեցին պատգամավորության թեկնածուներ Հովհաննես Իգիթյանը՝ «Իմ քայլը» դաշինքից, Ստեփան Գրիգորյանը՝ «Սասնա ծռեր» կուսակցությունից և Գևորգ Գորգիսյանը՝ «Լուսավոր Հայաստան» կուսակցությունից:
Հովհաննես Իգիթյանի դիտարկմամբ՝ նախկինում Հայաստանը եթե անդամակցում էր որևէ կազմակերպության, ապա դա անում էր, քանի որ, ինչպես նախկին իշխանությունն էր ասում՝ չանդամակցելու դեպքում կպատժվեինք. «Հայաստանը միշտ լուռ նստած էր և ՀԱՊԿ-ում նույնիսկ անվտանգության հարցերի վերաբերյալ կանոնակարգը մշակելիս Հայաստանը որևէ առաջարկ չի ներկայացրել»:
Ս. Գրիգորյանի դիտարկմամբ՝ ՀԱՊԿ-ում Հայաստանն ունեցել է բացթողումներ․ «Պետք է ուսումնասիրել այդ բացթողումները, դրանով կարող ենք աջակցել Ն. Փաշինյանին: ՀԱՊԿ-ում Փաշինյանը մարտավարական քայլեր արեց, բայց ռազմավարական քայլեր չարվեցին, պետք է պայքարել սկզբունքների համար, անհրաժեշտ է նոր, ճիշտ առաջարկներ ներկայացնել:
Մենք հաղթող դուրս եկանք՝ հետ կանչելով Խաչատուրովին: Դրանից հետո պետք էր մի քիչ հետ քաշվել, ՀԱՊԿ գլխավոր քարտուղարի հարցը ՀԱՊԿ-ում չպետք է կոշտ դրվեր: Հիմա բարդ իրավիճակ է ստեղծվել»:
«Ճիշտ կլիներ ՀԱՊԿ գլխավոր քարտուղարին հետ կանչելուց առաջ պարզաբանել կանոնակարգերը»,- նշեց Գ. Գորգիսյանը՝ հավելելով, որ Հայաստանը, որպես կողմ, կարող էր առաջարկել փոփոխություններ ՀԱՊԿ կանոնակարգում:
Մանրամասն՝ տեսանյութում:
