Կենտրոնաաֆրիկյան Հանրապետությունում իրավիճակը սպառնում է վերածվել ցեղասպանության՝ ՄԱԿ ԱԽ-ի առջև նման նախազգուշացմամբ է հանդես եկել Ցեղասպանության կանխման հարցերով ՄԱԿ-ի հատուկ խորհրդական Ադամ Դիենգը: Այս մասին հայտնում է Associated Press-ը:
Դիենգն ու ՄԱԿ-ի այլ ներկայացուցիչներ ՄԱԿ ԱԽ-ին հայտնել են երկրի քրիստոնյա և մուսուլման բնակչության միջև դիմակայության մեջ բռնության աննախադեպ մակարդակի մասին: Մասնավորապես, հրապարակվել են վկայություններ երեխաների գլխատման և գյուղերի հրդեհման դեպքերի մասին: Բանախոսները կոչ են արել երկրի տարածքում մեծացնել խաղաղապահական զորակազմը:
ՄԱԿ-ի տվյալներով՝ Կենտրոնաաֆրիկյան Հանրապետությունում մոտ 1 մլն մարդ ստիպված է եղել լքել իր տները, նրանց մոտ կեսը երեխաներ են: Բացի այդ, առնվազն 6000 երեխաներ մասնակցում են մարտական գործողություններին: Հարյուր հազարավոր մարդիկ թաքնվում են անտառներում: Ընդհանուր առմամբ բռնությունն ու դրա հետևանքներն իր վրա զգում է երկրի բնակչության կեսը:
