Վերաքննիչ քրեական դատարանը դռնփակ նիստում այսօր մերժեց Շանթ Հարությունյանի բողոքը՝ անփոփոխ թողնելով ընդհանուր իրավասության դատարանի որոշումը, որով երկու ամսով՝ մինչև մարտի 5-ը, երկարացվել է նրա կալանքի ժամկետը: Այս մասին հայտնում է «Ազատություն» ռադիոկայանը:
Դատապարտյալների հիվանդանոցում բուժում ստացող Շանթ Հարությունյանին դատարան չէին բերել։ Նրա փաստաբան Ինեսա Պետրոսյանը դատարանի որոշումը որակել է քաղաքական, ճնշման փորձ։
«Կալանքը հիմնավորում են, որ նա կարող է ազդեցություն գործադրել գործով անցնող վկաների վրա։ Մինչդեռ գործով անցնող վկաները ոստիկանության աշխատակիցներ են, սա ուղղակի ստանդարտ ձևակերպում է, որևէ ձևով փաստարկված չէ, որևէ նյութ ներկայացված չէ, թե նա ինչպես կարող էր ազդեցություն ունենալ այդ վկաների վրա։ Փաստորեն ճաղերի ետևում պահվում են 13 հոգի, մի քանիսին մեղսագրված է միջին ծանրության հանցագործությունների կատարում, և նրանք ևս գտնվում են կալանքի տակ և նույնիսկ այլընտրանքային խափանման միջոցներն են մերժում։ Այս ամենը խոսում է, որ այստեղ իրոք կա քաղաքական ուղղվածությունը»,- ասել է փաստաբանը։
Այս գործով 14-րդ կալանավորվածը՝ Անուշավան Գրիգորյանը ճանաչվել է անմեղսունակ և գտնվում է հոգեբուժարանում:
Մանրամասները՝ «Ազատություն» ռադիոկայանի կայքէջում
