ԿԸՀ-ի լիազորությունները կավարտվեն մինչև հուլիսի 14-ը, սակայն չի բացառվում, որ թեկնածուների առաջարկները նախագահին շուտ լինեն, և նոր ԿԸՀ-ն ձևավորվի մինչև այդ ժամկետը: Այս մասին այսօր արտահերթ նիստից հետո հայտարարեց Կենտրոնական ընտրական հանձնաժողովի նախագահ Գարեգին Ազարյանը:
Հարցին, թե ցանկություն ունի՞ դարձյալ ղեկավարել ԿԸՀ-ն, Ազարյանը պատասխանեց. «Անկեղծ ասեմ, երեկ ես հայտնաբերեցի, որ նորից կարող եմ առաջարկներ ներկայացնել Ընտրական օրենսգրքի վերաբերյալ: Այսինքն՝ ես արդեն 8 տարի է՝ փոփոխությունների առաջարկներ եմ ներկայացնում, և եթե կգա մի պահ, երբ կհասկանամ, որ էլ չեմ կարող որևէ նոր բան առաջարկել, եթե ինձ փորձեն էլ առաջարկել ղեկավարել հանձնաժողովը, կհրաժարվեմ»:
Նրա խոսքերով, 2012-ի խորհրդարանական ընտրությունները դրանց կազմակերպման, հրապարակայնության ապահովման ու անցկացման իմաստով էապես կտարբերվեն նախորդ ընտրություններից:
«Ընտրական նոր օրենսգիրքը ավելի լավ ընտրություններ կապահովի, քանի որ ԿԸՀ-ն նույնպես ներգրավված է եղել բարեփոխումների աշխատանքներում: Մեր ներգրավվածությունը ունի միտում՝ ամեն առաջարկը արել ենք՝ ելնելով նախորդ ընտրությունների մեր փորձից: Հաշվի ենք առել բոլոր այն առաջարկությունները, որոնք արվել են ԵԱՀԿ/ԺՀՄԻԳ-ի դիտորդական առաքելության կողմից: 1-ից 6-րդ հոդվածը եթե կարդաք՝ միանգամից պարզ կլինի, թե ինչպիսի մեծ տարբերություն կա հրապարակայնության առումով: Իսկ հրապարակայնությունը հնարավորություն է տալիս ավելի վերահսկելի դարձնել ընտրությունները»,- նշեց Գարեգին Ազարյանը։