Թուրքական Today’s Zaman թերթում հրապարակվել է եվրոպական քաղաքական կենտրոնի վերլուծաբան Ամանդա Փոլի «Ադրբեջանը գալիս է Բրյուսել» խորագրով հոդվածը, որում ասվում է.
«Նախորդ շաբաթ ես Բրյուսելում մասնակցեցի Կրանս Մոնտանայի ֆորումին։ Դրան պատվավոր հյուրի կարգավիճակով մասնակցում էր Ադրբեջանի նախագահ Իլհամ Ալիևը, որը նաև հատուկ նվեր ստացավ։ Ադրբեջանական պատվիրակության կազմում են եղել նաև Ադրբեջանի առաջին տիկին Մեհրիբան Ալիևան և մի շարք ադրբեջանցի նախարարներ ու գործարարներ։
Վերջին երկու տարիների ընթացքում դա Ալիևի առաջին այցն էր Բրյուսել, որտեղ նա օգտագործեց ընձեռված հնարավորությունը՝ հանդիպումներ ունենալու եվրոպացի բարձրաստիճան չինովնիկների, այդ թվում՝ նաև Եվրահանձնաժողովի, ԵԽ-ի ու Եվրախորհրդարանի նախագահների, ինչպես նաև էներգետիկ և Եվրոպական հարևանության քաղաքականության European Neighbourhood Policy (ENP) գծով պատասխանատու եվրակոմիսարների հետ։
Բրյուսելում պաշտոնական Բաքուն բանակցություններ վարեց ԵՄ-ի և Ադրբեջանի միջև անցագրային ռեժիմի մեղմացման շուրջ։ «Արևելյան գործընկերություն» ծրագրի շրջանակներում ընդգրկված մյուս երկրների նման Ադրբեջանի հետ անցագրային ռեժիմի մեղմացումը կնպաստի ադրբեջանցիների տեղաշարժին դեպի ԵՄ և, ի վերջո, կհանգեցնի այդ ռեժիմի վերացմանը։
Դեռևս չի խոսվում Ադրբեջանի և ԵՄ-ի միջև ազատ առևտրի համաձայնագրի մասին, քանի որ դրա համար Ադրբեջանը նախ պիտի անդամակցի Առևտրի համաշխարհային կազմակերպությանը (ԱՀԿ)։ Էներգետիկ ոլորտում համագործակցությունը ԵՄ-ի և Ադրբեջանի փոխհարաբերությունների առավել կարևոր տարրերից մեկն է։
Ադրբեջանն առանցքային դեր ունի ԵՄ-ի հարավային էներգետիկ միջանցքի հարցում, որը միտված է կասպյան և մերձավորարևելյան գազը դեպի Կենտրոնական և Արևելյան Եվրոպա հասցնելուն։ Ադրբեջանի գազային պաշարները գնահատվում են 2.2 տրիլիոն խորանարդ մետր։ Նա արդեն իսկ պարտավորվել է ԵՄ-ին մատակարարել իր գազը։
Բացի այդ, Ադրբեջանն ունի տարանցիկ երկրի մեծ պոտենցիալ, նա կարող է որպես «դարպաս» ծառայել կենտրոնասիական (մասնավորապես թուրքմենական) գազի համար։
Ադրբեջանի տնտեսության առաջատար ճյուղն էներգետիկան է։ Ալիևի խոսքերով՝ ներկայումս օտարերկրյա ներդրումների տարեկան ծավալը կազմում է 100 միլիարդ դոլար, վերջին տարիների ընթացքում տնտեսությունն աճել է 300 տոկոսով։ Վերջին շրջանում Ադրբեջանում ստեղծվել են 900,000 նոր աշխատատեղեր։
Սակայն էներգետիկ ոլորտից մեծ կախում ունեցող Ադրբեջանը կարիք ունի դիվերսիֆիկացնելու տնտեսության մյուս ճյուղերը։ Խոսքը գյուղատնտեսության և IT ոլորտի մասին է։ Քանի դեռ ղարաբաղյան հակամարտությունը չի ստացել իր լուծումը, և տարածաշրջանում չեն վերացել դանդաղ գործողության ականները, Ադրբեջանը չի կարող զարգացնել իր ողջ պոտենցիալը»։
