Հունիսի 24-ին աշխատանքային այցով Լեռնային Ղարաբաղի հանրապետությունում էր ՀՀ ՏՄՊՊՀ նախագահ Արտակ Շաբոյանը: ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի նախագահ Հ.Ղահրամանյանի հետ Ա.Շաբոյանը քննարկել է համագործակցության հիմնական ուղղությունները, անդրադարձել համատեղ վարույթների վարման ընթացքին:
ՀՀ ՏՄՊՊՀ նախագահը պատասխանել է նաև մրցակցության ոլորտում առկա խնդիրների վերաբերյալ հարցերին և կարևորել է ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովին կից Հասարակական խորհուրդ ստեղծելու անհրաժեշտությունը:
Ա.Շաբոյանի և Հ.Ղահրամանյանի կողմից համատեղ անցկացված արտահերթ նիստի ընթացքում քննարկվել են նաև դեղատների, առևտրի կետերի, դիզվառելիքի և մի շարք այլ ապրանքային շուկաներին վերաբերող հարցեր:
Նիստի ավարտին, շնորհակալություն հայտնելով Ա.Շաբոյանին, Հ.Ղահրամանյանը նշել է, որ առկա խնդիրների լուծման համար ակնկալում են գործուն օժանդակություն և աջակցություն, ինչին ի պատասխան ՀՀ ՏՄՊՊՀ նախագահը նշել է Հանձնաժողովի պատրաստակամության մասին:
Հիշեցնենք, որ անցյալ տարվա հոկտեմբերին ՀՀ ՏՄՊՊՀ և ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովների միջև ստորագրվել է համագործակցության հուշագիր:
Համաձայն հուշագրի, հանձնաժողովները համագործակցելու են մրցակցային քաղաքականության իրականացման բնագավառում փորձի փոխանակման, օրենքների եւ նորմատիվ իրավական այլ ակտերի մշակման, միջազգային կառույցներին անդամակցելու, համատեղ վարույթների իրականացման և փոխադարձ հետաքրքրություն ներկայացնող այլ խնդիրների շուրջ:
