Սելեկտիվ աբորտները Հայաստանում առկա են արդեն 20 տարի, ինչի առաջին շեղումներն ակնհայտ դարձան դեռևս 90-ականներին: Այսօր տեղի ունեցած մամուլի ասուլիսի ժամանակ այս մասին ասաց ՄԱԿ-ի բնակչության հիմնադրամի հայաստանյան գրասենյակի գլխավոր տնօրեն Գարիկ Հայրապետյանը՝ հավելելով, որ ներկայում Հայաստանում 100 աղջկա դիմաց ծնվում է 114 տղա:
«Սա բավական լուրջ խնդիր է: Տղա ունենալու ցանկությունը միջինում 6 անգամ գերազանցում է աղջիկ ունենալու ցանկությանը, ընդ որում՝ քաղաքներում այդ ցանկությունը մեծ է 4 անգամ, գյուղական համայնքներում՝ մինչև 10 անգամ: Սա ազգային մտածելակերպի արդյունք է»,- նշեց նա:
Գարիկ Հայրապետյանի խոսքով՝ այսօր արդեն Հայաստանում կա մինչև 20 տարեկան 40 հազար ավելի տղա, քան աղջիկ:
«Որոշ երկրների, ինչպես, ասենք, Չինաստանի ու Հնդկաստանի օրինակից դատելով՝ այս երևույթը բերելու է միայնակ ծերության, իսկ միայնակ տղամարդիկ առավել հակված են կրիմինալի: Հնդկաստանում աղջիկ երեխան ընտանիքի համար բեռ է. ամուսնանալիս նրան պետք է տալ օժիտ, տուն, ինչը դժվար հարց է: Աղջիկ երեխաներին, առհասարակ, խտրական են վերաբերվում չծնված շրջանում, այնինչ հետո աղջիկները դառնում են ընտանիքում առավել սիրված»,- ասաց ՄԱԿ-ի բնակչության հիմնադրամի հայաստանյան գրասենյակի գլխավոր տնօրենը:
Գարիկ Հայրապետյանը նկատեց, որ եթե սելեկտիվ աբորտները մոտակա տարիներին շարունակվեն նույն տեմպերով, ինչ այսօր են, ապա մինչև 2060 թվականը Հայաստանում չի ծնվի 38 հազար պոտենցիալ մայր:
«Միաժամանակ, այսօր աբորտները մեր երկրում նվազման միտում ունեն՝ վերջին հինգ տարում հասնելով 29 տոկոսի: Այլ խնդիր են տնային պայմաններում կատարվող աբորտները, որոնց հստակ թվաքանակի մասին ոչ ոք չգիտի: Ինչ վերաբերում է գրանցված աբորտներին, ապա դրանց թիվը, 2010-ի տվյալներով, մոտ 28 հազար է»,- ասաց նա:
Բանախոսի համոզմամբ՝ աբորտների կանխարգելման գործում հսկայական դեր ունեն բժիշկները, որոնք պետք է անեն ամեն ինչ՝ կնոջը համոզելու նման քայլի չդիմել:
