Անգլիայի Պրեմիեր լիգայի 11-րդ տուրի կենտրոնական խաղում Լոնդոնի «Արսենալը» վաղը «Էմիրեյթս» մարզադաշտում կհյուրընկալի «Լիվերպուլին»: Բուքմեյքերներն այս մրցավեճում ֆավորիտ են համարում «Լիվերպուլին»՝ վերջինիս հաղթանակի համար սահմանելով 2 գործակից: Ոչ-ոքին գնահատված է 3.7, իսկ դաշտի տերերի հաղթանակը՝ 3.5 գործակցով:
10-րդ տուրից հետո «Լիվերպուլը» 26 միավորով երկրորդ հորիզոնականում է: Նույնքան միավոր ունի նաև առաջին տեղում գտնվող «Մանչեսթեր Սիթին», սակայն լրացուցիչ ցուցանիշներով Պեպ Գվարդիոլայի թիմը առավելություն ունի: Լոնդոնյան ակումբը 22 միավորով 4-րդն է: Հաղթանակի դեպքում «Արսենալը» կարևոր քայլ կկատարի մրցանակային եռյակի համար պայքարում: 11-րդ տուրում «Մանչեսթեր Սիթին» սեփական հարկի տակ մրցելու է «Սաութհեմփթոնի», իսկ երրորդ հորիզոնականում գտնվող «Չելսին»՝ «Կրիստալ Փելեսի» հետ: Հավանականությունը մեծ է, որ առաջատարներն այս տուրում 3 միավոր կվաստակեն: Պարտության դեպքում Ունայ Էմերիի թիմը միավորների քանակով կարող է զգալիորեն հետ մնալ լավագույն եռյակից:
Հոկտեմբերի 31-ին տեղի ունեցած Անգլիայի լիգայի գավաթի խաղարկության 1/8-րդ եզրափակչի «Բլեքփուլի» հետ մրցավեճում «Արսենալի» մեկնարկային կազմում տեղ չէին գտել միանգամից 8 առաջատար ֆուտբոլիստներ՝ պաշտպաններ Բելերինը, Հոլդինգը, կիսապաշտպաններ Ջական, Տորեյրան, Իվոբին, Օզիլը, հարձակվողներ Օբամեյանգն ու Լակազետը: Նշված 8 ֆուտբոլիստները «Արսենալի» մեկնարկային կազմում մասնակցել էին Պրեմիեր լիգայի 10-րդ տուրի «Կրիստալ Փելեսի» հետ մրցավեճին: Ակնհայտ է, որ Էմերին նշված ֆուտբոլիստներին սկզբունքային խաղից առաջ հանգստանալու հնարավորություն էր տվել:
Ըստ բրիտանացի վերլուծաբանների՝ վաղը Էմերին կպայքարի 4-2-3-1 դասավորությամբ: Մասնավորապես, դարպասում կլինի Լենոն, իսկ պաշտպանության կենտրոնում՝ Հոլդինգն ու Մուստաֆին: Աջ եզրում կգործի Բելերինը, իսկ ձախից՝ Մոնրեալը, որն ապաքինվել է վնասվածքից: Հենակետային գոտում կխաղան Ջական և Տորեյրան: Կիսապաշտպանության աջ եզրում կլինի Իվոբին, իսկ Օբամեյանգը կխաղա ձախ եզրում: Ենթահարձակվողի դիրքում էլ կլինի Օզիլը, իսկ որպես նոմինալ հարձակվող կխաղա Լակազետը:
Առաջին հայացքից սա «Արսենալի» ամենաօպտիմալ կազմն է այս պահին: Նշենք, սակայն, որ Օբամեյանգին ու Լակազետին ոչ միշտ է հաջողվում կայուն ֆուտբոլ ցուցադրել 50-60 րոպեներից ավելի: «Բլեքփուլի» դեմ ոչ այնքան հաջող հանդիպումից հետո քիչ հավանական է, որ Հայաստանի ազգային հավաքականի ավագ Հենրիխ Մխիթարյանը կլինի մեկնարկային կազմում: Ամեն դեպքում պետք չէ բացառել մեր ֆուտբոլիստի՝ «Լիվերպուլի» դեմ խաղադաշտում հայտնվելը: Ավելի ստույգ՝ հավանական է, որ առջևի գիծն ուժեղացնելու նպատակով Էմերին Օբամեյանգի կամ Իվոբիի փոխարեն խաղադաշտ դուրս բերի Մխիթարյանին: Վերջինս, ի տարբերություն Օբամեյանգի, ավելի հաջող է խաղում պաշտպանողական գործողությունների ժամանակ: Իսկ «Լիվերպուլն» այն մրցակիցն է, որը հենց հանդիպման սկզբից կփորձի ճնշում գործադրել «Արսենալի» պաշտպանական դիրքերի վրա:
Կրկին Պրեմիեր լիգայում Մխիթարյանը կարող է խաղալ իր նախկին գլխավոր մարզիչ Յուրգեն Կլոպի դեմ: Նշենք, որ Դորտմունդի «Բորուսիայից» հեռանալուց հետո Մխիթարյանին չի հաջողվել տխրեցնել Կլոպին՝ գրավելով «Լիվերպուլի» դարպասը: Ու թեև փոքր, այնուամենայնիվ՝ Հայաստանի հավաքականի կիսապաշտպանն ունի այդ հնարավորությունը:
Խոսելով առաջիկա դերբիի մասին՝ Էմերին նշել է, որ իրենք որոշակի առավելություն ունեն, որը պետք է փորձեն օգտագործել: «Մենք խաղալու ենք «Էմիրեյթսում», և վստահ եմ, որ երկրպագուները հզոր էներգետիկա կհաղորդեն իրենց սիրելի թիմի ֆուտբոլիստներին: «Լիվերպուլը» մեծ թիմ է, բայց դա չի խանգարի մեզ պայքարել 3 միավորի համար: Այս պահին կադրային խնդիրներն այնքան էլ շատ չեն, և կան նախադրյալները երկրպագուներին ուրախացնելու: Արդեն որոշել եմ, թե ովքեր են լինելու մեկնարկային կազմում, և հուսով եմ՝ պայքարի դուրս եկած ֆուտբոլիստները կարդարացնեն սպասելիքները»,- ասել է Էմերին:
Առաջիկա խաղին հնարավոր է չմասնակցի «Լիվերպուլի» առաջատար Սալահը, որը լուրջ կուրուստ կլինի Կլոպի համար: Եգիպտացի ֆուտբոլիստը սուր ցավեր ունի ձեռքի հատվածում և չի կարողացել լիարժեք մարզվել: Ամեն դեպքում պետք է ընդունել, որ «Արսենալ»-«Լիվերպուլ» խաղում հյուրերի հաղթելու հնարավորությունն իսկապես ավելի մեծ է: «Արսենալի» թույլ օղակը շարունակում է մնալ պաշտպանությունը: Ավելին, Էմերիի թիմը վերջին հանդիպումներում գնդակը վերահսկելու հետ կապված լուրջ խնդիրներ է ունենում: «Լիվերպուլի» գլխավոր զենքերից են արագ և սուր գրոհները, որոնք, կարծում ենք, լուրջ խնդիրներ կառաջացնեն «Արսենալի» պաշտպանների համար: Շատ բան կախված է նաև Օզիլից, որի խաղը չստացվելու դեպքում «Արսենալի» միջին և հարձակողական օղակները, որպես կանոն, թույլ և թափթփված տեսք են ունենում:
«Արսենալ»-«Լիվերպուլ» հանդիպումը կսկսվի Երևանի ժամանակով 21:30-ին:
