«Առաջին լրատվական»- ի զրուցակիցն է «Քաղաքացիական պայմանագիր» կուսակցության վարչության ղեկավար Սասուն Միքայելյանը:
– Նոր Ընտրական օրենսգրքի ձախողումը շա՞տ է փչացրել Ձեր տրամադրությունը:
-Իմ տրամադրությունը երբեք չի փչանում, չանցավ-չանցավ, ես դա չեմ համարում չգիտեմ ինչ: Ընտրության կգնանք նախորդ Ընտրական օրենսգրքով: Իմ ցանկությունն այն էր, որ ռեյտինգային ընտրակարգ չլիներ, ժողովուրդը միշտ իրար դեմ է լինում, բարեկամը բարեկամից է նեղանում, հարազատը հարազատից, գիտեք՝ նախորդ իշխանությունները այդ տարբերակը բերեցին ձայն փախցնելու նպատակով և իրենց հաջողվեց:
-Հիմա նորից պահպանվել է այդ ընտրակարգը:
-Պահպանվել է, բայց իրենց չի հաջողվի, այսօր խելոք մարդը, հայը ո՞նց կարող է ձայն տալ նախորդ իշխանությանը, երբ որ 20 տարի նրա լծի տակ է եղել:
-Բայց հատկապես մարզերում ՀՀԿ տարածքային ներկայացուցիչները բավականին ամուր դիրքեր են ունեցել:
-Նրանք բռնի ուժով են դիրքեր ունեցել, երբ որ իշխանությունն իրենց ձեռքին էր գտնվում: Իսկ այսօր ժողովուրդն հասկանում է, որ ուրիշ աշխարհում է ապրում՝ անկախ, ազատ Հայաստանում: Այս իշխանափոխությունն արեց ժողովուրդը, մենք ընդամենն ուղղորդել ենք. ժողովուրդը հոգնել էր տարիներ շարունակ կուտակված խնդիրներից, դաժանությունից, լցոնումներից, ընտրակաշառքից: Ժողովուրդը չի ուզենա կորցնել իր ազատությունը: Ես չեմ ասում՝ այս կարճ ժամանակում տնտեսապես շատ բան է փոխվել, մարդիկ հոգեպես ուրիշ կերպ են ապրում՝ ազատ են, կամաց-կամաց կգնանք բարելավման տնտեսության և շատ այլ բնագավառներում:
-Նրանք, ովքեր կարծում են, որ հեղափոխությունն այս ընտրություններով պետք է ավարտին հասցվեր, մտավախություն ունեն, որ հին ԸՕ-ով չի հաջողվի:
– Թե՛ գործող, թե՛ նոր օրենսգրքով էլ գնանք, եթե օրենքը չես պաշտպանում, դա անիմաստ է. եթե այս ԸՕ-ով նախորդ ընտրությունները օրենքի տառին, բառին համահունչ անցկացվեին, էլի նորմալ օրենք է: Բայց իրենց համար տարբերություն չկար՝ ԸՕ-ն ինչպիսին կլիներ, ընդամենը գրել են, միֆեր են արել, որ ԸՕ-ն բարեփոխվել է, բայց իրենք արել են այն, ինչ ուզեցել են: Ռեյտինգային տարբերակը դարձել է գործիք այդ ռեժիմին սպասարկելու համար, բայց էսօր ժողովուրդը նման քայլի չի գնա, ոնց որ մարդը բռնի իր ձեռքով իր տունը քանդի… Այսօր ժողովուրդը պետք է վախենա, գնա ՀՀԿ-ին ձայն տա՞: Այսօր ուրիշ իշխանություն է, այսօր ժողովրդի իշխանությունն է գործում, մարդու գաղափարի, մտածելակերպի վրա ոչ մեկն իրավունք չունի ազդի:
-Լավ բան եք ասում, եթե, իհարկե, աշխատի:
-Լավ բաներ անելու ենք, չկասկածեք: Ուզում ենք, որ ժողովուրդն իր Ազգային ժողովը ձևավորի, ԱԺ-ն պարալիզացված էր:
–Մտավախությունն այն է, որ ռեյտինգային համակարգով ժողովուրդը դժվարությամբ կձևավորի կամ չի կարողանա ձևավորել այն ԱԺ-ն, որն ուզում ենք:
-Ո՛չ, ժողովրդի ազատ կամարտահայտության վրա ոչ ոք չի կարող ազդել: Նախկին իշխանությունը չի է, որ ժողովուրդը բռնի ուժով, կախվածությամբ, հացի հարց լուծելու համար ձայն տա ՀՀԿ-ին: Ո՞նց կարող է այդպիսի բան անել հիմա:
-Ինչո՞ւ նախկին իշխանության կուսակցությունն այդքան պայքարեց ռեյտինգային ընտրակարգը պահպանելու համար:
-Ուզում են ցույց տան, որ իրենք կան դեռ, բայց թող հասկանան՝ իրենք պրծել են արդեն, իրենք այս ժողովրդի ճակատագրի հետ են խաղացել, ճակատագրեր են խեղել տարիների ընթացքում:
-Մեր քննարկման մասնակիցներից մեկն ուզում էր հարց ուղղել Ձեզ՝ ինչո՞ւ «Քաղաքացիական պայմանագիրը» չի ասում, որ նախկին իշխանության կուսակցությունը հակապետական գործունեություն է ծավալել այս տարիների ընթացքում:
-Ինչի՞ նոր պիտի ասենք. հակապետական գործունեություն է ծավալել, հիմա առավել ևս պարզ է դարձել, թե ինչ է կատարվել ՀՀ-ում, որ հակապետական գործունեություն է ծավալել:
-Այդ դեպքում ինչո՞ւ չեք փակում այդ կուսակցությունը, որ հակապետական գործունեություն է ծավալել:
-Մենք կուսակցություն փակող չենք, կուսակցությունը ժողովուրդը կփակի, կտեսնենք այս ընտրություններով:
-Բայց մեծ է հավանականությունը, որ մենք էլի չենք ունենա մեր պատկերացրած քաղաքական մարմինը:
-Բնական է, ինչ-որ տարբերություն կլինի, բայց ոչ այդքան մեծ: Դե հիմա չանցավ նոր ԸՕ-ն, դա դեռ վերջը չէ, անհոգ եղեք:
– Գիտեք՝ կասկածանքը որն է, որ նոր իշխանությունն անհրաժեշտ ջանք չգործադրեց, որ ընդունվի:
-Մի բան ասեմ՝ եզի գլխին որ խփում ես, գոռում, ընկնում է, սա իրենց վերջին գոռոցը կլինի… ՀՀԿ-ում կան մարդիկ, որոնց հետ շատ նորմալ հարաբերության մեջ եմ, բայց համակարգը հակաժողովրդական, հակապետական քայլ է արել, տարիներ շարունակ բռնացել է սեփական ժողովրդին: Դրա համար ժողովուրդը՝ մայր ու մանուկ ոտքի էին ելել: Մի նորածին երեխայի մեջքին գրված էր «կաթադուլ»․ մենակ հայը կհասկանա, թե դա ինչ է: Ու նախորդ իշխանությունը պետք է իրեն համարի ժողովրդավա՞ր:
–Ձեր և ՀՀԿ-ի ջրերը երբվանի՞ց սկսեցին մի առվով չգնալ:
-Սպարապետ Վազգենից հետո ես միշտ էլ պրոբլեմ եմ ունեցել ՀՀԿ-ի հետ: Երբ որ Վազգեն Սարգսյանը ձևավորում էր կուսակցություն, այն ժամանակ ՀՀԿ անդամ եմ եղել, Կոտայքի մարզում հիմնականում ես եմ ձևավորել ՀՀԿ: Հետո է, որ Հանրապետականը դարձավ հանրասեփական, ես չկամ դրա մեջ: Վազգեն Սարգսյանը պետություն էր սարքելու, եթե Հոկտեմբերի 27-ը չլիներ, և նրա կողքի մարդիկ էլ էին պատասխան տալու իրենց արածի համար…
Հարցազրույցն ամբողջությամբ՝ տեսանյութում:
