Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ սկսվում է Բագրատ Վարդանյանի գործի դատավարությունը:
Ըստ մեղադրանքի՝ Բագրատ Վարդանյանը 2011 թվականի սեպտեմբերին Հայկանուշ Հ.-ի հետ պայմանավորվել է 370 հազար դրամի դիմաց իրականացնել Երևանի Սայաթ-Նովայի փողոցի շենքերից մեկում գտնվող նրա բնակարանի վերանորոգման աշխատանքները:
2011 թվականի նոյեմբեր-դեկտեմբեր ամիսներին Բագրատ Վարդանյանը նշված բնակարանում կատարել է 162 հազար 124 դրամի աշխատանքներ ու ստացել է ընդամենը 40 հազար դրամ աշխատավարձ:
Վարդանյանը բնակարանատիրոջից պահանջել է վճարել իր կատարած աշխատանքի համար, սակայն վերջինս ֆինանսական խնդիրների պատճառով չի կարողացել վճարել:
Բագրատ Վարդանյանը սպասել է մինչև 2012 թվականի փետրվար ամիսը:
Չստանալով կատարած աշխատանքի վարձատրությունը՝ նա փետրվար-մարտ ամիսների ընթացքում իր աշխատավարձի դիմաց ինքնակամ վերցրել է Հայկանուշ Հ.-ին պատկանող՝ 1 միլիոն 92 հազար 523 դրամ ընդհանուր արժողությամբ կենցաղային տարբեր իրեր, այդ թվում՝ 122 հազար 124 դրամը՝ որպես իր աշխատանքի վարձատրություն, իսկ 970 հազար 399 դրամը՝ որպես «ինքնապարգևատրում», նախաքննական մարմնի որակմամբ՝ որպես գողոն:
37-ամյա Բագրատ Վարդանյանին մեղադրանք է առաջադրվել գողության և ինքնիրավչության համար՝ ՀՀ քրեական օրենսգրքի 177 հոդվածի 2-րդ մասի 2-րդ կետով և 322 հոդվածի 1-ին մասով:
Վարդանյանի խափանման միջոցը ստորագրությունն է չհեռանալու մասին:
