Մինչ Կազանի հանդիպումը ՄԽ համանախագահները հայտարարեցին, որ եթե առաջիկայում առաջընթաց չլինի, ապա իրենք պետք է նոր հայեցակարգի շուրջ աշխատեն:
Քաղաքագետ Հրանտ Մելիք-Շահնազարյանն այսօր լրագրողների հետ հանդիպման ժամանակ նկատեց, որ նոր հայեցակարգի մշակման հավանականությունը կա:
Նա հիշեցրեց ԵԱՀԿ նախագահի հատուկ ներկայացուցիչ Անջեյ Կասպրշչիկի հարցազրույցը լեհական պարբերականներից մեկին՝ շեշտելով, որ այնտեղ հստակ երևում է, որ միջազգային հանրությունը գիտակցում է, թե որտեղ է սահմանափակվում զիջումների հավանականությունը, ինչպես նաև խոսվում է Արցախին միջանկյալ կարգավիճակ շնորհելու մասին:
«Կարծում եմ՝ այս պայմաններում, երբ Հայաստանի և Ադրբեջանի միջև բանակցությունները որևէ արդյունքի չեն հասնում, ավելի նպատակահարմար կլինի նոր հայեցակարգի և ֆորմատի մշակումը: Ֆորմատի փոփոխությունն անհրաժեշտություն է, և այդ դեպքում ԼՂ-ն կլինի բանակցային կողմ միջազգային ճանաչման ինչ-որ մի աստիճանով, իհարկե՝ ոչ ինքնիշխան ճանաչում, բայց գոնե բանակցությունների կողմ»,- մանրամասնեց քաղաքագետը:
Նա նաև նկատեց, որ այդ զարգացումները պարզելու համար այժմ ավելի խելամիտ է սպասել ՄԽ համանախագահների և Ադրբեջանի ու Հայաստանի ղեկավարների հայտարարությանը: