Չինաստանը շարունակում է հայտնել թռչնագրիպի վտանգավոր վիրուսով (H7N9) մարդկանց վարակման նոր դեպքերի մասին, սակայն բժիշկները հերքում են համաճարակի առաջացման հնարավորությունը: Այս մասին հայտնում ITAR-TASS-ը:
Հաղորդվում է, որ Ֆուցզյան մարզում (Արևելյան Չինաստան) հայտնաբերվել է երկու նոր դեպք՝ 38-ամյա կնոջ և 54-ամյա տղամարդու մոտ: Կինն ապրում է Ցզինցզյան քաղաքում, իսկ տղամարդը՝ Ֆուչժոու: Նրանց վիճակը գնահատվում է ծայրահեղ ծանր:
Եվս երեք վարակվածի մասին հայտնել են Չժեցզյան մարզի իշխանությունները: Երեք հիվանդների վիճակն էլ բժիշկները գնահատում են ծայրահեղ ծանր: Այդ մարզում վիրուսից արդեն 2 մարդ է մահացել: Հիվանդությունը գրանցվել է նաև Ցզյանսու, Գուանդուն մարզերում և Շանհայում: Վերջին երկու շաբաթներից վիրուսով ավելի քան 30 մարդ է վարակվել, 4-ը մահացել են:
«Այդ բոլոր դեպքերն էպիզոդիկ են, վիրուսի մուտացիաներ չեն հայտնաբերվել, որոնք կարող են անդրադառնալ բնակչության առողջության վրա»,- հայտնել են Առողջապահության և ծնելիության պլանավորման պետական կոմիտեում:
Երկրում խուճապ է. հունվարի 31-ին չինացիները կնշեն լուսնային օրացույցով Նոր տարին, իսկ հավով ու բադով կերակուրները միշտ ցանկալի են եղել տոնական սեղաններին:
