Նախօրեին խորհրդարանում ունեցած գործնականում ծրագրային ելույթում վարչապետ Նիկոլ Փաշինյանը ուշագրավ և բավականին ինտրիգային հայտարարություն արեց՝ խոսելով Մարտի 1-ի գործը բոլոր անկյուններով բացահայտելու մասին: Նա հայտարարեց, թե կոչ է անում հոգեբանորեն պատրաստվել այնպիսի բաներ լսելու, որը հեշտ չի լինելու: Մարտի 1-ը Հայաստանի նորագույն պատմության ամենազգայուն դրվագն է, բոլոր առումներով:
Այդ իմաստով Նիկոլ Փաշինյանի հայտարարությունը խիստ հատկանշական է, որովհետև հարց է ծագում, թե ինչ պետք է լսի հանրությունը, որ չի լսել մինչ այսօր: Թվում է, որ հասարակությունն առ այսօր սպասում է լսել միայն Մարտի 1-ի գործով արդարացի դատավճիռ, որը կվերաբերի այդ օրերին իշխանության այն պատասխանատուներին, որոնք չպետք է թույլ տային բռնություն հանրության հանդեպ և դրա հետևանքով մարդասպանություն Երևանի կենտրոնում, բայց թույլ են տվել, իսկ գուցե նաև անմիջական հրաման են տվել հանրությանը ճնշելու հարցում՝ անգամ մարդկանց կյանքից զրկելու առաջ կանգ չառնելու առումով:
Դատավճիռ լսելը հազիվ թե հանրության համար դժվար լինի և ունենա հոգեբանական պատրաստվածության կարիք: Հետևաբար պետք է եզրակացնել, որ վարչապետը նկատի ունի բոլորովին այլ տեղեկատվություն, որ առաջիկայում կլսի հասարակությունը: Ընդ որում, հատկանշական է, որ խոսքը գործը բոլոր «անկյուններով» բացահայտելու մասին է, ինչը գուցե ակնարկ է առ այն, որ այստեղ կան նաև «ուշադրությունից դուրս մնացած» հանգամանքներ, և ըստ ամենայնի հենց նոր հանգամանքներ լսելու մասին է խոսքը:
Մյուս կողմից՝ իհարկե պետք չէ բացառել, որ հոգեբանորեն պետք է պատրաստվի ոչ թե հանրությունը կամ ոչ միայն հանրությունը, այլ նաև ամենատարբեր հասարակական-քաղաքական սուբյեկտներ, որոնք այս կամ այն կերպ առնչություն են ունեցել Մարտի 1-ին՝ գործող իշխանությունից բացի, կամ հանրությունը նոր պետք է տեղեկանա, թե ինչ այդպիսի առնչություններ են եղել: Բոլոր դեպքերում, հայտարարությունն իսկապես ուշագրավ է և բացում է բավականին զգայուն հարցի վերաբերյալ որոշակի ինտրիգ, ու այն էլ մի ժամանակահատվածում, երբ հասարակական-քաղաքական կյանքը կենտրոնացած է արդեն դեկտեմբերին արտահերթ ընտրություն անցկացնելու օրակարգի և կարծես թե արդեն անշրջելիորեն սկսված գործընթացի վրա:
Վարչապետի հայտարարության մյուս ուշագրավ կողմն էլ հենց այդ է: Փաստորեն, Մարտի 1-ի վերաբերյալ անսպասելի, անակնկալ տեղեկությունների մասին վարչապետն ազդարարում է այդ գործընթացին զուգահեռ, և հարց է ծագում՝ այդ տեղեկությունները հասարակությունը կլսի և դրան պետք է հոգեբանորեն պատրաստվել խորհրդարանի արտահերթ ընտրությունից հետո՞, երբ լուծված կլինի ամբողջական իշխանափոխության ու թավշյա հեղափոխության ավարտի հարցը, թե՞ դրանից առաջ, այսինքն՝ նախընտրական շրջանում, որով գուցե կլուծվեն նաև ամբողջական իշխանափոխության և հեղափոխությունն ավարտելու համար անհրաժեշտ հարցեր:
