«Պետք է սպասել առաջին գնահատականներին: Իմ կարծիքով, երեկվա այն հայտարարությունը, որտեղ նշվում է, որ Ռուսաստանը պատրաստակամ է շարունակել այս գործընթացը, Կրեմլին մոտ կանգնած քաղաքագետների գնահատականները, ինչպես նաև Էդվարդ Նալբանդյանի հայտարարությունը, թե Ռուսաստանը պատրաստ է շարունակել բանակցություններն այս ֆորմատում, վկայում են այն մասին, որ հնարավորությունների դուռը վերջնականապես դեռ չի փակվել»,- ամփոփելով կազանյան հանդիպումը` կարծիք հայտնեց քաղաքագետ Հրանտ Մելիք-Շահնազարյանը:
Այնուամենայնիվ, ըստ քաղաքագետի, Ադրբեջանն այս տարվա ընթացքում արդեն 4-րդ անգամ է, որ ստորագրման պատրաստ փաստաթուղթը ստորագրելու փոխարեն, փոփոխություններ են առաջարկում և դրանով իսկ երկարաձգում և փոխում փաստաթղթի էությունը, ինչն էլ առաջիկայում ևս առաջընթացի հույս չի ներշնչում:
«Խնդիրը հասել է նոր մոտեցումներ ցուցաբերելուն. կլինի դա, թե ոչ` դժվար է ասել, ինձ թվում է ժամանակը ցույց կտա»,- ընդգծեց Մելիք-Շահնազարյանը:
Պատասխանելով հարցին, թե կարո՞ղ է Կազանի հանդիպումը նշանակել, որ միջազգային հանրության պրեսինգն արդեն չի աշխատում՝ Շահնազարյանը պատասխանեց, որ իրական պրեսինգ իրականացնելու միջազգային հանրության հնարավորություններն այս պարագայում դժվար է պատկերացնել, բացի հայտարարություններ անելուց. «Այստեղ միայն պետք է հաշվի առնել, որ հակամարտության իրական կողմը Լեռնային Ղարաբաղն է և այսօր ունի իրավունք իր դիրքորոշումները պնդելու: Այս պարագայում հայկական կողմը բավականին հիմնավոր պատճառներ ունի միջազգային ճնշման ազդեցության տակ չընկնելու համար: Այսօր հիմնական խնդիրը Ադրբեջանի հետ է, և դժվար է պատկերացնել, թե վերջինիս հետ ունենալով տնտեսական շահ, միջազգային հանրությունն ինչպիսի ճնշումներ է գործադրելու նրա վրա»:
Քաղաքագետը նկատեց, որ այսօր հիմնական խնդիրը պատերազմը կանխելն է, և իր գնահատմամբ` ճնշումները կլինեն այնքան, ինչքան որ անհրաժեշտ է խաղաղությունը պահպանելու համար` թեկուզ ներկայիս սահմաններում:
