Գալուստ Սահակյանից հետո, քաղաքացիներին կոմունալ խնայողություններ անելու խորհուրդ է տվել նաև Մանվել Բադեյանը: Սա այն պատգամավորն է, որը իբր բիզնեսով չի զբաղվում, բայց հեռուստահաղորդումներում նրա դեմքով հովանավորներ են գովազդում, իսկ լրագրողների հետ էլ «արա»-ով է խոսում: Այս պատգամավորին իր տեղը լավագույնս ցույց տվեցին եզդիները, որոնց նա վիրավորել էր:
Հայաստանցիները նրան իր տեղը ցույց չեն տվել, և այդ իսկ պատճառով էլ Մանվել Բադեյանը Գալուստ Սահակյանի օրինակից ոգևորված` ինքն էլ քաղաքացիներին խորհուրդ է տալիս խնայողություններ անել:
Կամ անզգա, կամ էլ անզգայության աստիճան ցինիկ պետք է լինել մինչև մինուս 20 աստիճան ձմեռ ապրող քաղաքացիներին խնայողության խորհուրդներ տալու համար: Թե դրանցից որն է Մանվել Բադեյանը, քաղաքացիներն իրենք կարող են որոշել: Իսկ իշխանությունները, ըստ երևույթին, որոշել են հասարակությանը վերջնականապես հունից հանել նման ցինիկ խորհուրդներով: Ժողովուրդը նման դեպքերում ասում է, որ ձայները տաք տեղից են գալիս:
Միլիոնատեր պատգամավորների ձայները տաք տեղից են գալիս: Ձայնը հասկանալի է, որ տաք տեղում է: Հարց է առաջանում, թե իսկ որտեղ է ուղեղը և բարոյականությունը: Որովհետև եթե թշվառության, ծայրահեղ աղքատության հասցված հասարակությանը նման խորհուրդներ են տրվում, ընդ որում` արդեն ոչ թե մեկը, այլ երկուսը, իսկ վաղը միգուցե երրորդ-չորորդն էլ միանան, ապա մեղմ ասած` կասկածներ են առաջանում ուղեղի և բարոյականության տեղակայվածության մասով:
Ինչպես Մայակովսկին կասեր՝ հրդեհվող սրտի վրա կելնեն քնքշանքով, ոչ թե հրեշավոր կոպիտ սապոգներով: Սակայն երևի թե ինտելեկտուալ վիկտորինաների հովանավորներին հարցերի մեջ Մայակովսկի չի պատահել` նրա խոսքերն իմանալու համար: Հասարակության հրդեհվող սրտի և ցրտից սառչող մարմնի վրա իշխանությունները բարձրանում են հրեշավոր կոպիտ սապոգներով: Սիրտն ու մարմինը առայժմ թույլ են տալիս դա, սակայն շատ հետաքրքիր հարց է՝ ի՞նչ տեղի կունենա, եթե իշխանությունների այդ վերելքը շարունակվի, որտեղ այն կընդհատվի, և երբ կլինի դա:
Իշխանության ինտելեկտուալները կարող են մտածել, եթե կարող են իհարկե: Որովհետև մտածելու ունակ մարդիկ մինչ այդ կարող էին մի քիչ մտածած լինել ժողովրդի մասին և նրան ցինիզմ մատուցելու փոխարեն, կգտնեին Հայաստանում առկա սոցիալական թշվառության պատճառ հանդիսացող խնդիրների լուծումները:
Լուսանկարում՝ Մանվել Բադեյանը՝ դստեր հարսանիքին
