Հայաստանի և ՄՄ անդամ երկրների քաղաքացիներին Ռուսաստանի հետ վիզային ռեժիմ չի սպառնում: Այս մասին այսօր «Առաջին լրատվական»-ի հետ զրույցում ասաց Ռուսաստանի միգրացիոն դաշնային ծառայությանը կից հասարակական խորհրդատվական խորհրդի քարտուղար, Հարևանության միջազգային կապերի զարգացման հիմնադրամի նախագծերի տնօրեն Յուրի Մոսկովսկին՝ անդրադառնալով ԱՊՀ երկրների հետ վիզային ռեժիմ սահմանելու անհրաժեշտության մասին ՌԴ փոխվարչապետի հայտարարությանը:
Նա նախ նշեց, որ պարոն Կոզակը ՌԴ արտաքին կապերի համար պատասխանատու չէ, ուստի փոքր-ինչ անհասկանալի է, թե ինչու է այդ մասին խոսել և ինչ է նկատի ունեցել փոխվարչապետ Կոզակը, քանի որ ավելի վաղ ՌԴ նախագահ Վլադիմիր Պուտինը հայտարարել էր, թե ԱՊՀ կամ ՌԴ հարևան երկրների հետ ՌԴ-ն վիզային ռեժիմ չի սաhմանելու: Սակայն, ըստ Մոսկովսկիի, չի բացառվում, որ երբևէ վիզային ռեժիմ ներդրվի ԱՊՀ երկրների հետ:
«Ռուսական հասարակության շրջանում հետխորհրդային հարևան երկրների հետ վիզային ռեժիմ սահմանելու անհրաժեշտության մասին խոսակցությունները շատ-շատ են: Այդ հարցը քննարկում են արդեն մի քանի տարի՝ որպես միգրացիոն հոսքերի վերահսկման մեխանիզմ: Սակայն դա չէ միգրացիոն հոսքերը վերահսկելու ամենաարդյունավետ եղանակը: Իմ կարծիքով, ժամանակակից վերահսկողական եղանակները միանգամայն բավարար են հոսքերի վերահսկման համար: Դրանք արտասահմանյան անձնագրերն են և մուտքի արգելքը՝ ապօրինություններ գործող միգրանտների և որոշ երկրների համար: Դա բավական է, որպես ոչ ցանկալի և ապօրինություններ գործող արտասահմանցի քաղաքացիները ժամանեն Ռուսաստան, այսինքն՝ ՌԴ-ի ներսում ռուսական օրենսդրությունը հստակ պետք է լինի այս հարցում՝ եթե խախտում է օրենքը, ապա մուտքն արգելվում է որոշ, այդ թվում առանց վիզաների երկրների համար»,- տեսակետ հայտնեց մասնագետը՝ հավելելով, որ «վիզային ռեժիմ» հասկացությունը ձևավորվել է դեռևս 19-րդ դարում, այդ գործիքը գործածվել է մի որոշ ժամանակ, իսկ հիմա շատ երկրներ դրանից հրաժարվում են և ճիշտ են անում:
Բայց, ըստ նրա, եթե երկրի ղեկավարությունն անհրաժեշտություն համարի այդ ռեժիմի ներմուծումը, ապա սկզբունքորեն ՌԴ-ի ներուժը կբարարի այն իրականություն դարձնելու համար:
«Այսինքն՝ տեխնիկապես դա հնարավոր է, այլ հարց է՝ անհրաժե՞շտ է այն, թե՞ ոչ, կբերի՞ այն խնդրի ռեալ հանգուցալուծման, թե՞ ոչ, քանի որ մարդիկ պահանջում են ոչ թե վիզային ռեժիմի ներդնում, այլ միգրացիոն հոսքերի վերահսկողություն և կարգավորում: Վիզային ռեժիմը գործիք է, բայց դա կարող է մեծացնել քաոսը, դա ավելորդ բյուրոկրատիա կառաջացնի: 2015 թ. ԱՊՀ քաղաքացիները կարող են ՌԴ մտնել արտասահմանյան անձնագրով: Երբ լինեն այս անձնագրերը, ապա սկզբունքորեն կարելի է նաև վիզային ռեժիմ մտցնել, բայց հարկավոր չէ»,- ասաց Յուրի Մոսկովսկին:
Վերջինս նաև պարզաբանեց, որ եթե նույնիսկ ապագայում վիզային ռեժիմ ներդրվի ՌԴ-ում՝ ԱՊՀ և հետխորհրդային մի շարք երկրների հետ, ապա դա Հայաստանին և ՄՄ անդամ երկրներին չի վերաբերի: Նրա պարզաբանմամբ՝ խոսքը ՄՄ անդամ պետությունների մասին չէ, քանի որ այդ երկրների միջև հատուկ ռեժիմ է գործում: «Այդ հարցը կարգավորվում է նաև երկրների երկկողմ հարաբերությունների մակարդակով: ՌԴ-ն Վրաստանի հետ վիզային ռեժիմ մտցրեց, բայց Հայաստանի քաղաքացիներին Ռուսաստանի հետ վիզային ռեժիմ չի սպառնում»,- ասաց Յուրի Մոսկովսկին:
Հիշեցնենք, որ Ռուսաստանի փոխվարչապետ Դմիտրի Կոզակը հայտարարել է, որ Ռուսաստանը տեսանելի ապագայում վիզային ռեժիմ կսահմանի ԱՊՀ պետությունների հետ: Նրա կարծիքով, վիզաներն անխուսափելիորեն անհրաժեշտ են, քանի որ պետությունների սոցիալ-տնտեսական զարգացման մակարդակն աշխարհում շատ տարբեր է: «Եթե մենք վիզային ռեժիմի օգնությամբ ի վիճակի չլինենք կարգավորել միգրացիոն հոսքերը, ապա հնարավոր չի լինի պաշտպանել երկիրը նաև ազգամիջյան հակամարտություններից: Տեսանելի ապագայում վիզաները, այնուամենայնիվ, ի հայտ են գալու»,- նշել է Կոզակը:
