Գերմանիայի դեմոկրատական հանրապետությունը 1980-ականների կեսերին հարկադրել է բանտարկյալներին արյուն հանձնել, որն այնուհետև վաճառել է Արևմուտքին: Այս մասին հայտնում է Berliner Zeitung-ը՝ հղում անելով ARD հեռուստաալիքին պատկանող Report Mainz հեռուստաամսագրին, որի տրամարության տակ են հայտնվել Արխիվների հետ աշխատանքի համար պատասխանատու դաշնային գերատեսչության՝ «Շտազիի» դեռևս չհրապարակված հետազոտության արդյունքները:
Ինչպես վկայում են «Շտազիի» փաստաթղթերը, արյան դոնորների դերով հանդես են եկել Վալդհայմի ուղղիչ հաստատության բանտարկյալները: Արյունը շվեյցարացի միջնորդների միջոցով գնել է Բավարիայի «Կարմիր խաչը»:
Դոնորական արյան հավաքման հարցրով արևելագերմանական գերատեսչության ղեկավարի տեղակալ Ռուդոլֆ Ուլիգը հաստատել է, որ իր ենթակաները արյուն են վերցրել նաև Գրեֆենտոն քաղաքի բանտի կալանավորներից:
«Այցն ուղղիչ հաստատություն արդարացված էր, ամեն անգամ այնտեղ արյուն էր հանձնում 60-70 մարդ, ինչն, անկասկած, լավ արդյունք է»: Ինչպես երևում է փաստաթղթերից՝ բանտարկյալները արյուն են հանձնել ոչ սեփական կամքով:
Բավարիայի «Կարմիր խաչը» չի հերքում, որ նման պրակտիկա եղել է, սակայն նշում, որ եթե իմանար, որ բանտարկյալներից հարկադրաբար են արյուն վերցրել, հրաժարվեր դրանից:
Հետազոտությունում ասվում է, որ շվեդական կահույքի IKEA կոնցեռնից բացի, արևելագերմանացի բանտարկյալների հարկադիր աշխատուժը կիրառվել է նաև մի շարք արևմտյան ընկերություններում, այդ թվում Aldi խանութների գերմանական ցանցում: «Հետազոտությունը ցույց է տալիս, որ IKEA-ն միայն սառցաբեկորի վերին մասն է»,- ասել է արխիվների հետ աշխատանքի հարցերով գերատեսչության ղեկավար Ռոլանդ Յանը:
