Ադրբեջանական ANS PRESS-ի փոխանցմամբ՝ 2014 թվականից սկսած, Ադրբեջանը պատրաստ է տարեկան 1 միլիարդ խորանարդ մետր գազ մատակարարել Բուլղարիային։
Այս մասին հայտարարել է Ադրբեջանի էներգետիկայի և արդյունաբերության նախարար Նատիգ Ալիևը, որը Բրյուսելում ընթացող «Կրանս Մոնտանա»-ի 22-րդ նիստի շրջանակներում հանդիպում է ունեցել Բուլղարիայի տնտեսության, էներգետիկայի և զբոսաշրջության նախարարի Տրայչո Տրայկովի հետ։
Ադրբեջանը պատրաստ կլինի Բուլղարիային գազ մատակարարել անմիջապես այն բանից հետո, երբ կմիացվեն Թուրքիայի և Հունաստանի գազաբաշխիչ ցանցերն, ու կսկսվի «Շահ Դենիզ» գազային հանքավայրի արդյունահանման երկրորդ փուլը։
Բացի այդ, նախարարները քննարկել են Բուլղարիային Սև ծովի միջոցով ադրբեջանական հեղուկ գազի մատակարարման հարցը։ Այս պլանում բուլղարական Булгартрансгаз և ադրբեջանական SOCAR ընկերություններն արդեն ավարտին են հասցրել նախագծի տնտեսական նպատակահարմարության հետազոտությունը։
Հիշեցնենք, որ Սև ծովով ադրբեջանական հեղուկ գազի ստացմամբ շահագրգռված են նաև Ռումինիան և Ուկրաինան։
