Ուկրաինան հետաքրքված է ԵՄ-ի հետ Ասոցացման համաձայնագիր ստորագրելու հարցում և «ԵՄ-ին առընթեր Ուկրաինայի ներկայացուցչության մակարդակով» համաձայնագրի ստորագրման նախադրյալների վերաբերյալ խորհրդակցություններ է անցկացնում: Այս մասին հաղորդում է ITAR-TASS-ը` վկայակոչելով Ուկրաինայի ԱԳ նախարարության տեղեկատվական քաղաքականության դեպարտամենտի տնօրեն Եվգենի Պերեբեյնոսին:
«Մենք սպասում ենք, որ առաջիկայում նման խորհրդակցությունները կշարունակվեն»,- ասել է նա:
Պերեբեյնոսը հիշեցրել է, որ դրանք անցկացնելու մասին պայմանավորվածությունը ձեռք է բերվել դեկտեմբերին` Ուկրաինայի առաջին փոխվարչապետ Սերգեյ Արբուզովի` Բրյուսել կատարած այցի ժամանակ:
ԱԳ ներկայացուցիչը նշել է, որ եվրաինտեգրումն Ուկրաինայի համար մնում է հիմնական ուղղություն:
«Որքան մենք հասկանում ենք, ԵՄ-ն կողմ է նման համաձայնագրի ստորագրմանը: Շուտով այդ հարցի շուրջ խորհրդակցությունները կսկսվեն, և մենք կստորագրենք փաստաթուղթը»,- հավելել է նա:
