«Դեռևս Հայաստանի ստորագրությունը շարունակում է մնալ այդ արձանագրությունների տակ: Ինչի՞ ենք սպասում: Ստացվում է՝ Թուրքիան սպասում է Ղարաբաղի հարցում իրենց ի նպաստ ինչ-որ լուծումի, որ հաստատի ստորագրած արձանագրությունները, իսկ մենք էլ սպասում ենք, որ դրանից հետո հաստատենք: Ի՞նչ է ստացվում: Մենք պահանջում ենք հետ վերցնել ստորագրությունը այդ վտանգավոր արձանագրություններից: Միշտ պետք է հաշվարկել, որ այս արձանագրություններին դեմ է հայ ժողովուրդը, դեմ է Հայաստանի Հանրապետության Սահմանադրական դատարանը: Հետո, որևէ այլ պահի կարելի է նախաձեռնել նոր, ոչ ստորացուցիչ հարաբերություններ Թուրքիայի հետ»,- այսօր ՀՅԴ 31-րդ Ընդհանուր ժողովի ընթացքում, խոսելով անցած տարիներին արտաքին քաղաքականության բնագավառի իրադարձությունների մասին, նշեց ՀՅԴ Բյուրոյի ներկայացուցիչ Հրանտ Մարգարյանը:
Ղարաբաղի հարցին անդրադառնալով՝ Մարգարյանն ընդգծեց, որ խաղաղ կարգավորման գործընթացն անցած երեք տարիներին նոր փուլ չի մտել, սակայն միջազգային հանրության մեջ առավել ամրապնդվել է այն տեսակետը, որ Արցախը չի կարող վերադարձվել ադրբեջանական ենթակայության. «Կարգավորման ուրվագծվող հնարավորությունը, սակայն, հայկական կողմից պահանջում է այնպիսի զիջումներ, որոնք մեր և մեր ժողովրդի մեծամասնության համար անընդունելի են: Անհրաժեշտ է ազգովի պատրաստ լինել դիմագրավելու այդ ոչ անհավանական պահը»:
Հրանտ Մարգարյանն առանձնացրեց նաև Ջավախքի հարցը՝ նշելով, որ թեև Վրաստանի իշխանությունները անցած տարիներին երկրամասը օժտել են հաղորդակցության և էներգետիկ ժամանակակից ենթակառույցներով, սակայն հստակ նպատակադրումով երկրամասը մնում է Վրաստանի տնտեսապես ամենահետամնաց շրջանը. «Վրաստանի իշխանությունները շարունակում են աննախընթաց ճնշում գործադրել հասարակության ակտիվ շրջանակների վրա և վախի մթնոլորտ ստեղծել ժողովրդի մեջ: Բացահայտորեն խոչընդոտվում է Ջավախքի ժողովրդի հայկական ինքնության պահպանումը, շարունակվում է քաղաքական խտրականությունը հայ ազգաբնակչության նկատմամբ, ժողովրդագրական վիճակը ի վնաս հայության փոխելու քաղաքականությունը»:
Մարգարյանը հայտարարեց, որ Ջավախքը վառոդով լեցուն տակառ է, ուշ թե շուտ պայթելու է, եթե ժամանակին չցուցաբերվի խոհեմություն, և Ջավախքին չտրվի այն, ինչ սահմանում է միջազգային օրենքն ու փորձը, և Դաշնակցությունը մնում է ջավախքհայության ինքնավարության պահանջի կողքին:
Տեղեկացնենք, որ ՀՅԴ 31-րդ ընդհանուր ժողովին մասնակցում էին տարբեր քաղաքական ուժերի ներկայացուցիչներ: Հանրապետական կուսակցությունը ներկայացնում էր Գալուստ Սահակյանը, ԲՀԿ-ից ներկայացել էին Արամ Սաֆարյանն ու Վարդան Բոստանջյանը, ԲՀԿ-ից՝ Սամվել Բալասանյանը, ՕԵԿ-ից՝ Մհեր Շահգելդյանը, «Ժառանգություն»-ից՝ Րաֆֆի Հովհաննիսյանն ու Արմեն Մարտիրոսյանը:
