Ուսամա բեն Լադենը սպանությունից առաջ ցանկացել է վերանվանել իր ղեկավարած կազմակերպությունը՝ «Ալ-Քաիդան»: Այս մասին հաղորդում է Associated Press գործակալությունը:
Ինչպես հետևում է Բեն Լադենի սպանությունից հետո հայտնաբերված նամակներից՝ մահվանից որոշ ժամանակ առաջ ահաբեկիչն ասել է, որ հենց սկզբից ինքը ցանկացել է, որպեսզի իր կազմակերպությունը կոչվի «Քաիդա Ալ-Ջիհադ» (Սրբազան պատերազմի հիմք): Գործակալության փոխանցմամբ, Բեն Լադենը, որն ատել է կապիտալիզմը, մարկետինգից լավ է հասկացել և ցանկացել է փոխել ահաբեկչական խմբավորման անվանումը՝ թարմություն հաղորդելով դրան:
Որպես հնարավոր տարբերակ՝ քննարկվել են «Մոնոթեիզմ և Ջիհադի խումբ» կամ «Խալիֆաթի ապստամբություն» անունները: Բեն Լադենին ամաչեցրել է «Ալ-Քաիդա» անվանումը, քանի որ նրանում ակնարկ չկա, որ սա իսլամիստական կազմակերպություն է:
