Թուրքական Radikal թերթը, վկայակոչելով Al Jazeera հեռուստաընկերության թղթակից Ջեյմս Բայսին, հայտնում է, որ Թուրքիան լավաշ է մատակարարում Մուամար Քադաֆիին հավատարիմ մնացած զորքերին։
Այս մասին Բայսը նշել է Twitter-ի իր էջում։ Քադաֆիին հավատարիմ զորքերի պահեստներում հայտնաբերվել է այս տարվա մարտին թվագրված թուրքական արտադրության լավաշ։
Լիբիայում Արևմտյան կոալիցիայի ուժերի ռազմական միջամտությունը մեկնարկել է մարտի 19-ին, իսկ ՄԱԿ ԱԽ-ն այդ մասին որոշումը կայացրել է փետրվարի վերջին։
Այսինքն ստացվում է՝ եթե ապացուցվի, որ այդ լավաշները մատակարարել է Թուրքիան, ապա վերջինս դրանով իսկ խախտած կլինի ՄԱԿ-ի բանաձևը։
Հիշեցնենք, որ լիբիական զարգացումների սկսվելուց հետո Թուրքիան քանիցս մեղադրվել է այդ երկրի հանդեպ երկդիմի քաղաքականություն վարելու մեջ։
