Գլենդելաբնակ հայազգի 20-ամյա Պիեռ Մորադյանը դատական հայց է ներկայացրել քաղաքային ոստիկանության մի քանի ծառայողների դեմ՝ հայտարարելով, որ մարտին հավաքույթի ժամանակ ձերբակալելիս իրեն գետնին են տապալել, ինչի հետևանքով իր մոտ առկա են հաճախակի գլխացավեր: Այս մասին հայտնում է Glendale News-Press-ը:
Լոս Անջելեսի գերագույն դատարան ներկայացրած հայցում նա նշում է, որ մարտի 2-ին իրեն սխալմամբ են ձերբակալել՝ այն բանից հետո, երբ ինքը ոստիկաններին հարցրել է, թե ինչու են ձերբակալում իր ընկերներին, ովքեր ծխել են հավաքույթի մասնակիցներից հեռու՝ մասնավոր տան հարակից ճանապարհին:
Հանկարծ նրանց է մոտեցել մի կին ոստիկան և հրամայել ձեռքերը վեր պարզել: Այնուհետև նա հավելյալ օգնություն է կանչել: Այնտեղ են ժամանել 23 ոստիկաններ, 11 ոստիկանական մեքենաներ և մեկ ուղղաթիռ:
Դրանից հետո Մորադյանը դուրս է եկել տնից ու հարցրել ոստիկաններին, թե ինչ է կատարվում: Ենթադրաբար, նրան ձերբակալել են հասարակական վայրում հարբած գտնվելու համար: Նրան 6 ժամ անց ազատ են արձակել առանց մեղադրանքի առաջադրման: Քոլեջի ուսանողը, ով մտադիր է իրավաբանական կրթություն ստանալ, տառապում է ֆիզիկական և էմոցիոնալ խանգարումներով:
Առանց ակնհայտ հանցանշանների ոստիկանական խուճապը նրա փաստաբան Մարի Տեր-Բարսեղյանը «ծիծաղելի» է գնահատել:
